猶記得當年生硬到痹嘅絕招「風雷電」，居然有𡃁仔練招練到跳樓！闊別35年，幪面超人1、2號捲土重來，以全新手法拍攝電影版《TheFirst》，新作喺CG、打鬥全部有板有眼，2大Rider同索加幫都設計得更有時代感，絕對與時並進，年屆30嘅朋友，電影上畫時引唔到你買飛入場，超豪嘅港版3區DVD仲豐富過日本嘅單碟版，睇怕你都幾難走得甩！
記者：徐影龍
1.激凸立體包裝盒
代理話搞得最耐就係個3D碟盒，要做到凸起效果，個位要就得好準，太馬虎會影響整體觀感，單睇呢點已感到港版嘅誠意。
2.袖珍版場刊
其實即係日本試影會時派發嘅場刊，以Fit番DVD包裝嘅尺寸重現眼前，全彩印刷有齊人設同故事，排版都好靚，值得珍藏。
3.1套6款明信片
有齊6位主要改造人嘜頭嘅明信片，Size亦係有DVD盒咁大，加上採用超靚厚身卡紙，點捨得用呀？
4.特大火紅海報
兩大主角同旋風號嘅型仔Pose，紅色做底貼出嚟夠晒搶眼，唯一可惜係海報摺細放喺盒內，真係要燙番直先Show得出嚟。
本來呢套《幪面超人TheFirst》限定版，原定上星期喺書展率先發售，可惜「3D盒面」做唔切，代理惟有延至本周趕喺動漫節推出。筆者收到Sample時，盒面仍未做起，證明代理唔會急就章咁求其，撚到靚先拎出嚟賣。
似全盒咁豐富
港版3區DVD將推出普通版及限定版，最豪嘅限定版喺包裝上相當之有心思，唔計電影內容同BonusDisc，單睇4大精品已經夠賣點，加上建議零售價都只係$150，相當之抵玩啦！
對打招式眼前一亮
坦白講，筆者本身對近代幪面超人冇乜好感，甚麼龍騎、空蛾完全無Feel。但呢套《TheFirst》卻令筆者相當有驚喜，未Feel到當年嗰種熱血前，單睇對打招式已經值回票價，由隻抽到群抽都不含糊，拳腳間招招有力，而且動作流暢，就算睇慣武打片嘅港人都唔會失望，雖然好多都係靠威吔做出嚟，不過逼真自然感真係比《Matrix》仲要好，唔講仲以為係港人做武指㖭！
而涉及嘅武學範籌亦相當之廣，隨便數到嘅便有寸勁、旋風腿、關節技及投技等，經典絕招「風雷電」更係活現眼前！希望35年後嘅今日唔會再有𡃁仔因此而跳樓啦。
大量懷舊設定
雖然《TheFirst》屬全新故事，基本上跟35年前電視版大相徑庭，不過仍保留好多原著嘅特色，好似開首嘅「蛇嘛咯，索㗎！」主題曲、着燈大眼同紅頸巾、電單車後大爆炸、舉起雙手慢Fing、2號專用嘅轉身360「風雷電」等，都令人相當懷念，喺大堆重新設定底下，仍保留到原著味道，值得鼓掌！
論故事亦係充滿時代感，講1、2號先做壞人，再互不順超而大打出手，最後仲爭埋女㖭，連索加幫嘅怪獸都有感情線，相當之貼近現實，一啲都唔覺老套。
Bonus碟 長達2小時
附送嘅Bonus碟收錄長達2小時內容，唔單只有63分鐘製作特輯，講咗好多拍攝背後嘅辛酸事，仲有幾個試映會現場實況，睇番1號演員黃川田將也真人都唔係咁「MK」啫，女主角小嶺麗奈亦省鏡好多，最好笑係日本試映會嗰段，飾演2號嘅高野八誠話搞咗成日，都唔知襯咩皮帶好，卒之戴咗條幪面超人旋風腰帶，佢阿媽話呢條最靚喎，結果佢真係夠膽戴住去試映會！
