舉凡女人，嫩的、老的、風情的、硬淨的，都總有其觀賞談論價值。不談花邊juicy大小女星紅模，單是我們香港兩位在同一時期引退，又同一時間回歸的前女高官陳方安生和葉劉淑儀，單是衣着打扮就教人津津樂道。近期兩人不約而同tonedown轉型，僅是意味心態改變還是背後又將湧起一番風雲？時裝設計師鄧達智今次品評兩人的衣着，大讚陳太夠貴氣，而告別掃把頭的葉劉淑儀磨平棱角後溫柔度大增，但尚有進步空間。撰文：梁錦貞
談到陳方安生的衣着，鄧達智大讚無懈可擊：「陳太嘅『官太』look絕對係經典，單係打扮呢環已經可以出書。以前佢有官職，經常紅色、粉紅色旗袍打扮，適當地配少少首飾好似珍珠鏈、classic款Chanel手袋等，最unique嘅accessories當然係佢嘅四萬笑容啦。
「最近陳太上街遊行，打扮tonedown咗，一副『畀大家重新認識我』嘅款。陳太始終係陳太，着casual衫走入群眾，冇師奶咗。我最怕身光頸靚嘅議員一上街就刻意着bossini風褸同T恤，好唔真心，陳太就仍然咁有class，好似佢鍾意Burberry咁，你以為因為英國名牌？我覺得佢要同內地人打成一片就真，𠵱家內地邊個唔識Burberry？」
陳太至愛衣着品牌：專人訂做的旗袍、St.John、Missoni、Ports1961、Burberry、Chanel
葉劉淑儀以往的掃把頭是其標記，最近她削薄頭髮，感覺不同，鄧達智說：「前保安局局長葉劉淑儀做官時嘅打扮，尤其係掃把頭髮型係經典，連同佢嗰句『我連自己嘅頭髮都捍衞唔到，點捍衞香港嘅保安』，都不過只係經典笑話，我覺得係負面嘅，只不過係易記易認，鮮明啲啫。唯一值得讚嘅係佢着衫一向好隨心，但係距離個好字好遠。
「葉劉𠵱家留學返嚟，將掃把頭削薄咗，好似將棱角磨平晒。佢嘅衣着顏色都fresh咗，呢個都係tonedown嘅表現，𠵱家嘅葉劉好似亁淨企理嘅高級OL，同佢把頭髮一樣，成個人soft晒。雖然係咁，但仲有進步嘅空間，應該可以做得更好，相信大家都好期待。」
