醫學會副會長史泰祖同老婆史陳尚欣，噚日喺中區女青年會園景軒餐廳搞咗個甜品buffet，有酒店同餐廳贊助食物，仲標榜低脂、低糖。史太同八方講，為咗個活動足足籌備咗成兩個月，班義工仲通宵整曲奇，希望為「匡智會」籌到5萬。
阿瑟王同太太好早到場，仲企咗成個幾鐘先走。佢攞咗200蚊出嚟，幫史泰祖乖女買咗兩盒明信片。阿瑟王話佢同太太都有鋪甜品癮，仲話老婆最鍾意將個廚房變甜品工場！唔怪得佢食晒成碟椰撻同曲奇啦！佢仲話暑假要等放榜，冇得去旅行，因為到時梗有人鬧我！估唔到佢做局長做到咁灰。
阿瑟王走咗冇耐，就輪到林D9拖老婆到場。林D9好疏爽咁捐咗500大元，之後佢仲想攞錢買曲奇，不過畀史泰祖阻止。佢同八方講，70年代同史泰祖一齊讀HKU，而佢老婆同史太又係英華校友，所以嚟支持吓。林D9話好少做義工，因為有時間都會同老婆食晏，或者同囡囡睇戲，真係夠晒幸福！