舒夫真高雖然轉會英超車路士冇幾耐，但求大俠日前就八到，佢想自己個BB第日為英格蘭國家隊賣命喎。「軍刀」好波就係人都知，原來佢做人仲叻，擦鞋功夫亦不遑多讓。
「軍刀」個囝囝叫佐敦，𠵱家先20個月大，好似十畫都未有一撇，但係「軍刀」嚟到倫敦一陣，就學識點樣喺英國生存，對住啲英國報紙笑晒口話，第日個仔代表邊個國家踢波，係佢同太太嘅決定，而佢哋兩公婆又好鬼喜歡英國呢個地方，所以唔排除佐敦第日代表英格蘭！
抵你賺200萬周薪
「軍刀」拎埋自己個BB出嚟，真係估佢唔到，你話有咩辦法唔賺14萬鎊（約200萬港元）周薪呀！做人圓滑都好嘅，「軍刀」咁講，一來知道烏克蘭人才一般，始終都係冇前途，二來又可以𠱁吓英國佬開心，贏得更多球迷支持；當然，球星個仔通常都冇個得，「軍刀」個仔第日踢唔踢波都未知啦，話唔定佢第日打木球呢，都係講住先啫。
17年後，今日嘅英國神童禾確特都係35、6歲，加埋碧咸個大仔布魯克林，同埋17歲嘅舒夫真高（佐敦），英格蘭嘅前線組合咪係「舒夫真高+禾確特+碧咸」（姓氏），真係「超強鐵三角」咯！畀求大俠諗吓都得啩！
「我知道你哋實笑我求大俠諗得太天真㗎喇……所謂『別人笑我太瘋癲』，第日英格蘭真係出現『舒夫真高+禾確特+碧咸』嘅話，你哋就笑唔出！」