新世界中國（917）喺新一輪嘅宏調措施下，分分鐘係贏家，現價抵搞。北大人繼之前推出限制土地供應政策，物業項目又必須符合35%注資規定，最新呢期限制外資進入房地產意見中，將計劃新進場者嘅門檻大幅調高。要咁睇，新中早已經喺祖國擁有1.7億平方呎土儲，加埋手頭現金42.5億銀（負債比率只係4%），土儲充足兼銀彈多，優勢好明顯彈出。
再講，好多同晒士股份，經過呢期調整，P/B仲高企兩、三倍水位，新中現價（2.99元）相對NAV6.2元折讓近52%，有NAV墊底。又新中去年供股，阿媽新世界（017）所持新中權益爆晒燈，要配售凸章股份之餘，仲要向承配人包底（承配人可以喺明年5月底前，要求新世界以每股2.9元購回新中股份）。新中現價同呢個包底價差無幾，博NAV收窄到40%，新中潛在升幅近25%。
金威啤3蚊撈底
金威啤酒（124）今年頭5個月銷量按年上升30%，6月又受惠世界盃，加埋天時暑熱，飲酒好似飲水，嚟緊06年度中期（6月止）業績應該靚仔。估計金威增長24%，純利接近1億銀計數，已經可以炒業績。
又保守計數，金威全年度純利增幅20%，PE跌到18倍，同類股預期PE係貼近30倍，金威大落後。Before中期業績，股價再有調整，250日線3蚊撈底，博金威上番今年2月高位3.75元，潛在回報率25%。
錢雋