甚麼叫歎？發了達，像皇帝一樣，享受珍饈百味酒池肉林？抑或簡簡單單，大熱天時，在一間冷氣房，喝杯凍飲吃啖新鮮美食呢？無論你要求怎樣，食，對任何人都是種享受，如果嚐到原汁原味已經算「好」歎，那麼把一條2呎長的即叫即燒的新鮮鰻魚吞入肚，就肯定是「長」歎了。
記者：張一豪
攝影：楊錦文、譚盈傑
模特兒：Violet（Intermediagroup）
原條燒鰻魚$300
原條鰻魚重兩斤多一點，非常肥美，燒熟後收縮亦足有2呎長，上枱非常震撼，肉厚有口感食得出鮮味。原條上會跟一條風亁燒魚骨亁，入口香脆又高鈣。
原條燒最香脆
Violet是標準鰻魚迷，無論中式豉汁蒸大鱔，又或者普通鰻魚壽司，對她來說都是人間美味，所以一知道「串神」有原條新鮮燒製鰻魚，她流着口水仆到去試：「我恨咗好耐，終於可以大大啖成條食！」入店，師傅和哥已經把2呎長鰻魚生劏，半途開始燒出油，油灑在爐面出現搶火現象，和哥噴點水滅火，蒸出陣陣鰻魚香：「日本有食鰻魚嘅特定日子『土用之丑之日』，即立秋前18日嘅夏日。鰻魚含豐富維他命A、B1、B2、蛋白質、脂肪、鈣、鈉、鐵同磷，夏天最當造肥美，所謂不時不食，呢個時候食燒鰻魚最正。」
食埋條魚骨
燒好，上碟，Violet邊喫邊聽和哥解說：「喺日本，早期習慣將鰻魚切成一段段圓筒狀，再用竹籤串住燒，因為形狀似香蒲穗，所以叫做『蒲燒』。𠵱家最流行嘅江戶風蒲燒，係參考宮廷做法，先上醬汁『白燒』一次，再拎去用強火蒸去除多餘脂肪，蒸完再點醬汁燒香。」「串神」做法不同，直接燒至熟，逼出油份後，整條鰻魚變得卜卜脆，和哥說：「平時我會用魚骨熬鰻魚汁，如果原條上，我會將條骨風亁再燒到香脆，入口肯定勁脆。」
或許Violet太狼吞虎嚥，和哥連忙說：「靚女唔使食咁急，朗豪坊搞緊慢食文化，慢慢食，拖長嚟食先叫長歎嘛！食完鰻魚試埋其他串燒，唔，就試埋烏雞串燒喇，《本草綱目》寫到明烏雞好滋補，醫學證據顯示烏雞含18種氨基酸，加上維他命、煙鹼酸蛋白質、脂肪、鈣質、磷、鐵、尼古丁酸等等，夏天人就最容易見暈見攰，食烏雞對腰部痠痛好有功效㗎。」
1.鹹燒日本空豆3條$38
日本空豆即是中國蠶豆，夏天當造，一般日本食法是烚熟加鹽吃，師傅改用燒烤方式，多了一份焦香，剝殼後蘸一點點海幼鹽，甘香鬆化。
2.荔枝海鮮串$35
本來一半份量賣$20，現在荔枝當造，這份是夏日加長版，份量多一倍。串起帶子、蝦與荔枝，表面酸汁非一般茄汁，師傅特別配製過，能帶出海鮮的鮮和荔枝的甜。
3.鹽燒車海老每隻$38
啖啖肉足足有9吋長，鹽燒把表面燒到亁身，保存蝦的鮮甜，一打開肉質仍保持彈牙，嗜蝦者一次嚐一隻肯定不夠，不要忘記食埋多膏的蝦頭。
4.烏雞肉子串燒每串$18
用片薄烏雞肉捲住雞子一起燒，咬開流出雞子甜汁，十分鮮味不覺腥，是道十分滋補的菜，小心食多兩串流鼻血。
5.限量烏雞串燒$38
左起燒得十分香脆的普通雞皮（$9）、卜卜脆烏雞皮（$11）、爽口新鮮鹽燒烏雞腎串（$14）、爽脆烏雞軟骨（$11），有肉味有骨香的烏雞頸（$16）及鹽燒烏雞心（$14），全部限量供應。
6.鵝肝香葱芝麻烏雞中翼 每隻$40
新出品，去骨雞翼釀入鵝肝、肉碎及香葱同燒，未上桌已濃香四溢。皮層油份在高溫下溶化滲透配料，一咬肉汁四溢極香口。
食客有Say
「第一次嚟幫襯，朋友推介串燒，多啲朋友先會考慮叫原條燒鰻魚。」
「串燒燒得幾香口，如果有機會都會試吓原條鰻魚，得一兩個人，驚食唔晒呀。」
「串燒幾有特色，食過燒雞泡魚亁，幾香口。原條燒鰻魚？下次多啲人嚟會試試。」
解說
火燒旗杆──長歎，這歇後語沒特別出處，純粹玩諧音，把「長炭」喚成「長歎」，因為燒掉旗杆只會剩下一支修長的黑炭。這歇後語用來比喻得到一筆可觀的意外之財，從此可以好好享受，打跛雙腳不用愁，打後日子可以「長歎」。
搵食攻略
串神（35144333）
地址：旺角朗豪坊L12-09
營業時間：星期一至五12:00nn-3:00pm，6:00pm-11:00pm；星期六、日及公眾假期12:00nn-11:00pm
交通：旺角地鐵站C朗豪坊出口
座位：80個，每日7:30pm-10:00pm最旺場，要等位，接受電話訂座
人均消費：$120-$180
最好賣：野米壽司系列，用法國野米配混合壽司米，健康兼口感特別，串燒則以荔枝海鮮串最大賣
有着數：午市每位送2+3C手卷，是新鮮蔬菜做的壽司手卷