做得大廚，揸得鑊鏟，一定係以客人的口味為準則，有獎攞的話更是錦上添花。不過海景軒中菜廳總廚梁輝雄師傅，就多一個座右銘：「我煮菜，自己覺得ok就可以，攞唔攞獎唔緊要。」寓工作於娛樂，試問有幾多人可以做到呢？小記認識梁師傅的名字，全都是因為他創的菜式︰「嗰時聽你整個三國菜，又整過紅樓宴，用著作裏面的菜名煮個菜出嚟，你到底點諗㗎？」師傅話：「一來我自己鍾意睇書，見到書中菜式再加想像力去煮，難度一定有，不過好有成功感。」又是一個梁師傅以烹飪娛樂自己的好例子。
梁師傅有這樣的性格，是做學廚時訓練出來。他跟我說：「記起初初入行跟師傅嘅時候，幾年都係幫師傅洗衫、洗碗，成日偷偷學師，好多嘢都要一腳踢……」嘩，少點忍耐力都不行，所以梁師傅懂得寓工作於娛樂。於2005年，梁師傅以中西合璧的「柚甫藕茸蟹箝」獲得香港旅遊發展局舉辦之美食大賞銀獎，第一次梁師傅感覺到攞獎獲得認同是那麼興奮。睇住梁師傅攞住自己的得獎菜式拍照，師傅從來煮菜都只求自己高興，今次參賽獲獎，唔知師傅會唔會攞上癮呢？
記者︰方綺君
蜜梅京燒骨$100
腩排混和酸梅蜜糖同煮，再撒上芝麻，味道比酸甜排骨更加惹味，適合夏天夠開胃，師傅仲好自豪咁講︰「個餸一推出就成功，𠵱家人人必叫。」
柚甫藕茸蟹箝$148
呢個餸就係梁師傅攞獎之作，中式的食材配以西式的賣相，每層都吃到不同的味道，如蟹肉鮮甜，柚皮入口即溶的口感，多重享受。
龍船多寶球$388
將從法國入口的多寶魚起肉炒球，拼以酥炸魚骨盛載，此菜式的靈感，是來自端午節的龍舟，又一證明梁師傅幾咁有創意啦！
海景軒（27312883）
尖沙嘴東部麼地道70號海景嘉福酒店B2