北泰創業集團（2339）由現價2.90元升到16元，要等幾耐？
北泰大股東、董事總經理兼行政總裁周天寶，兜咗個圈畀咗個答案，係5年。
周氏今年5月中出席「2006中國汽車零部件工業論壇」時，開出期票，5年內要將北泰市值提升到起碼200億港元，並躋身恒指成份股之列，成為藍籌股。
市值要見200億
北泰現時發現股本12.47億股，上周收2.90元，市值不過36.18億元。北泰重有小量可換股票據，行使價2.40元至2.43元，明年到期，如果行使，股數只會大約增加2670萬股，增幅好細。
好嘞，北泰市值要升到200億元，假設股數不變，代表股價要升到16元，即未來5年每年複式上升40%先至可以達標（如果計入可換股票據行使，股數多咗少少，則股價亦須升到15.70元先至達標，每年複式升幅38%多啲，對股東嚟講亦係和味）。
支持股價未來5年內升到16元，有賴賺錢能力不斷提升。北泰產銷汽車零部件，產品包括低附加值零件如制動片與制動蹄，高附加值產品則有制動系統件與懸架系統組件，均屬橋車部件。市場以出口為主，早已在歐美主要汽車市場建立良好關係，下一步係打開內地市場。
神州市場一直係海外車商必爭之地，去年中國汽車共銷590萬輛，晉身為全球第2大汽車消費國，佔全球汽車比重達8.7%，汽車零部件市場亦潛力無邊。
根據周氏在論壇上預測，以05年全國汽車零部件銷額達550億元（人民幣．下同）推算，4年後可增至14000億元，年增率達36%。
北泰06年度（3月年結）營業額27億元，增21%。周氏預測07年度應增30%至40%，未來3年年增率估計會超過30%。
平過敏實好多
以07年度增40%計，北泰營業額達37.8億元。06年度邊際利潤率13%，07年度保持同一水平，盈利料達4.9億元。假如08、09與10年均有30%增長，10年度盈利可打破10億元大關而達10.8億元。假如發行股本不變，每股盈利高至0.87元，約0.83港元；屆時股價升至16元，PE19.3倍，雖略偏高，但非絕對不切實際。
周氏呢張期票，兌現可信程度頗高，況且北泰正全力擴展，提高產能以配合市場需求，提早達標至200億港元有可能。中央政府更可能扶佢一把，啱啱出台嘅汽車產業政策，全力提倡本地化配套，提高國內汽車零部件技術研發與創新能力，加上中國已成為全球採購生產中心，北泰食正呢個大潮流，5年內要市值大升4.5倍，只有早冇遲。
其實唔止周氏信心爆棚，基金亦紛以行動支持。經4月配售後，SansarCapital續有增持行動，至今持有10.12%北泰，為周氏持有52.42%以外第2大股東，另外德意志持6.09%。
北泰5年睇16元，當然會有人話睇得太遠。今朝有股今朝炒，講吓短炒搵食，目標價3.6元（4月配股作價3.625元），見呢個價，預期PE都只係9.6倍，只係同類股敏實集團（425）嘅1半多啲。
講起敏實，隻股去年11月以每股2.25元招股，現價5.80元，升幅158%，預測PE上到18.4倍。北泰落後敏實好多，又平好多，要炒汽車零件股，點解唔揀北泰？
高彰坡