軟硬天師前晚在紅館繼續開騷，請來四大天王之一張學友任嘉賓。學友甫上台便批評舞台似廁所，又暗寸軟硬歌藝麻麻，兩位天師即時發功，笑指對方自從做了香港廸士尼名譽大使後，竟帶旺了海洋公園，令學友尷尬不已。
一連10場「軟硬天師LongTimeNoSee演唱會」前晚舉行第二場，演出嘉賓是四大天王之一張學友，捧場的圈中人包括俞琤、上山詩鈉等，緋聞情侶方力申及鄧麗欣（Stephy）也分別到場欣賞。軟硬表現較首場有默契，葛民輝的甩嘴情況亦有改善。
上台歌癮發
軟硬今次開騷特地請來四位天王任嘉賓，由黎明打頭陣，第二場輪到張學友上場。學友甫出場即批評舞台似廁所，又說：「我個髮型師買咗佢哋嘅飛，猛問我係咪棟篤笑，但知道係演唱會就話死喇，我答佢話係演唱會，仲話OK嘅！」似是暗寸兩人歌藝麻麻。
當學友唱完兩首歌後，本應下台，可是全場歌迷即時起哄，軟硬即大叫：「咪走呀！」於是學友再次上台，獻唱《每天愛你多一些》，又謂已很久沒唱歌，故今次歌癮大發。
愛搞搞震的軟硬拿學友開玩笑，葛民輝說：「你做咗大使（廸士尼）之後，反而帶旺咗海洋公園喎！」學友聞言頗為尷尬。之後兩人又以卡通公仔高飛狗來取笑學友早前與狗仔隊發生衝突一事，可是學友說：「我真係唔知佢講乜，最近好少出嚟。」葛民輝即沒趣地表示要轉話題。
改詞頌父愛
軟硬繼為黎明舊歌《我的親愛》重譜新詞後，前晚林海峰將學友的《偷閒加油站》和《每天愛你多一些》的歌詞加入廸士尼人物，又將《你的名字我的姓氏》改頭換面，變成「做咗老竇，無憂無求。偉大學友，係香港老友。有女俾你湊，為香港奮鬥，咁好邊處有！」
採訪：楊潔雯
