買豪宅，令楊思琦從此洗脫屋邨港姐之名，卻沖不走慳妹之實。買豪宅沒有令她攀登富豪生活，相反為了供樓，思琦除付出努力不停工作外，更要加倍的節衣縮食。小時候思琦弄壞書包，媽咪幫她修理再用，吊腳褲也照穿如儀，現在吃燒豬她也會將骨打包，帶返家用來餵狗。女人慳家原是美德，雖然人家把她當作笑話，思琦也能從容地說：「俾人笑自己冇所謂，只要自己覺得開心咪得囉。」
節儉本來是美德，偏偏發生在楊思琦身上，卻變成笑柄；就像早前她在新劇拜神儀式上，拿幾件剩下的燒豬骨回家餵狗，做些任何一個普通人也會做的事情，結果？又再被說三道四，指她「食得唔好嘥」，取笑她「又食又拎」云云。不過，管人家怎樣看、怎麼想，她也不會因為人家看扁看輕而改變，因為她從小便是這麼的一個人，且聽楊思琦的慳妹自白。
零錢儲一半
楊（楊思琦）：小學五、六年班左右，我已經知道搵錢艱難，如果冇錢會好唔安全。細個陪媽咪買餸，見佢周圍格價，話買貴咗就會好唔抵；以前書包帶爛咗，媽咪會幫我整番再用；條褲唔啱着，佢又會幫我放腳，既然仲可以用，就唔好浪費。雖然有時見同學仔文具好靚，書包好靚，會好羨慕，但靚未必要擁有，至多放學之後去書局望吓，咁已經好滿足。
不單止節儉，思琦母親從小還教曉她積穀防飢。
楊：以前媽咪每日畀幾蚊零用錢，都會叫我留番一半儲起，但世界唔同咗，𠵱家小朋友冇咁嘅意識，可能只生一個，做父母嘅怕佢哋唔夠，寧願畀多啲，有啲父母過份溺愛子女，小學生已經攞手提電話，都係以前世界單純啲！
記事簿Mark數
入行多年死慳死抵，思琦終在數月前儲夠首期買樓，在西九龍泓景臺購買了一個450萬的單位，月供三萬餘元；為了供樓，思琦不但性感行騷狂接工作，而且較以前更加節衣縮食。
楊：買咗樓之後，食同着方面都會更慳，好似出街食飯唔食咁貴，揀啲有得免費泊車嘅食肆，因為有啲地方泊車都好貴。食唔晒嘅食物，咪打包留番第日食，唔使咁浪費；如果出街食T骨扒，食淨嘅骨頭我都會攞番屋企餵狗。買嘢方面，𠵱家都唔會買咁多，就算買，都會等減價至買。另外，我買咗本記數簿，mark低每日開支，以前我都有咁做，近排再寫番，我覺得咁做好有用，可以畀到自己反思機會，唔好亂咁fing錢，同埋睇住自己啲卡數會唔會愈簽愈多。
節儉是習慣
節衣縮食被當作笑柄，心中可感難受？
楊：俾人笑自己冇所謂，呢啲係個人習慣，個人態度，我唔會唔開心，可能有啲人未試過，咪覺得咁做係唔啱，只要自己覺得開心，覺得充實咪得囉。
最近同米雪一齊拍劇，聽佢講咗好多返內地探訪嘅所見所聞，令我有好大感觸，覺得自己真係好幸福。佢話好多內地人每個月連幾十蚊都賺唔到，有次帶啲糖畀內地班小朋友，原來佢哋冇食過糖，做訪問時，食食吓粒糖都要放番落包裝紙度，等陣再食番，唔捨得掉咗佢。有啲人成日笑內地人着衫，笑佢哋唔理做乜都要着西裝，但又唔理解佢哋背後可能冇其他衫着，做人唔可以單憑外表下判斷。
舊衫贈親友
回憶初入行時，思琦也曾因着衫問題而遭人嘲笑。
楊：初入行，好多人同我講，話做藝人着過一次啲衫就唔好要，我曾經試過着同一件衫出席唔同活動，結果俾人笑我：『又着嗰件衫出嚟！』我真係唔捨得着一次就唔要，好浪費，mixandmatch嘅話可以再着啫！不過，慢慢我都明白到呢個係工作需要，所以有時着唔番嘅衫，我會儲埋佢送畀人，總好過就咁掉咗去！
一日24小時中，思琦有三分二時間用於工作，日復日，年復年，如此拼搏，原來不單單為買樓供款。
楊：公司有好多人才，自己唔努力啲，好容易畀人超過；反正自己唔怕辛苦，愈多嘢做會愈精神㖭！
撰文：戴彩煥
攝影：林德雄
服裝：MarcbyMarcJacobs
化妝：DephineChan
髮型：BenLambyILCOIPO
