長毛（圖）下個月會出遠門，佢話王丹邀請佢去美國，出席一個有關中國問題嘅座談會。咁難得可以越洋表達意見，長毛好想去，不過，佢擔心去唔成，大家都知美國入境簽證唔容易搞，又要申請，申請完又要面試，長毛因為有案底，所以怕領事館唔發簽證畀佢。
其實長毛個底又真係幾花，早喺02年，佢已經有八次案底，兼且坐過兩次監。到今日個「快勞」肯定更加厚。好似今年3月，佢又因為反對加費曾經揸車堵塞東隧入口，同阿牛等人被判入獄12日。
不過，八方又覺得長毛唔使太愁，佢畢竟係尊貴嘅立法會議員，而犯嘅事多數係為民請命。今次去民主交流，美國自命係全球最民主自由嘅國家，若然唔畀佢入境，唔怕俾全球愛好民主人士唱衰咩。