煲呔要郁港台係人都知，再整單陳太開咪，想唔死都幾難，廣播處處長（DB）朱培慶都有晒心理準備，不過，就算喺下風，身在其位都要據理力爭，否則啲人蝦得就蝦，到最後就位都冇得企。
話說副廣播處長（DDB）吳錫輝退休，朱培慶向晉升委員會力薦兩位手下，特別係推舉戴健文接任吳嘅空缺，港台員工亦寫咗封好長嘅信畀王永平局長，表達佢哋對政府空降AO（政務主任）做副廣播處長嘅關注，擔心此先例一開，到2008年朱培慶退休，個DB位都被AO霸佔埋，而佢哋嘅工作，唔只係技術層面，仲有好多editorial嘅專業判斷，要由DDB同DB作最後決定。
所謂意見可以表達，上頭接唔接納係另一回事，前日有兩個AO嘅大名吹出嚟，話會做副處長，當中以電訊管理局副總監傅小慧呼聲較高。八方睇吓個日曆，吳錫輝下個月11號就lastday，都係時候宣布繼任人，家吓講強政勵治，唔通好似老董嗰時咁等到最後一分鐘都冇人名咩。
事事講制度格食格
傅小慧洋名Gracie，港大畢業，87年考入政府做AO，調過去常務科、銓敍科及工商科，又做過庫務局、駐多倫多經貿辦事處以及新機場工程統籌署，行政經驗好豐富。99年起，佢去咗做同電訊有關嘅嘢，2G續牌、3G發牌都有佢份。之前大家以為佢會留番喺電管局接明年退休嘅區文浩棒做總監，但原來佢目前係D3，唔可能一步登天升做D6，所以要去港台坐坐，做啲成績出嚟，再等機會更上層樓。
Gracie一直係何宣威嘅部下，王永平要搵人空降去整治港台，當然要一個信得過嘅人物，何況佢阿姐出名細心，事事講制度，對於港台呢個大家庭式嘅部門，正好格食格。況且，Gracie今次係第二次空降，上次去電管局都冇問題，呢次難度較高，正好睇吓佢點表演。
總之，政府嘅意向好明顯，港台準備定接招可也，空降副處長只係第一步，仲有大把手段。八方都好想知朱培慶點睇傅小姐，但佢人不在港，去咗北京出席乜嘢太陽計劃嘅活動，唔知係咪冇眼睇，由得煲呔玩。