噚日經濟發展及勞工局局長葉澍堃去東涌巡區，唔知佢係咪驚東涌好似天水圍咁變做「悲情城市」，所以要親自睇吓區內嘅就業情況。
佢去咗富東邨聖公會東涌綜合服務辦事處，聽職員講解為區內人士提供嘅就業服務。葉澍堃睇吓展板，又坐吓個為培訓機場清潔人員而設嘅「假機艙」，又同有意入職迪士尼樂園而接受訓練嘅人士交談。八方見佢個樣好似好滿意，可能心入面諗緊，遲吓中五放榜，好多畢業生要搵嘢做，今日展翅同青見又開始聯合招生，叫東涌同天水圍都宣傳吓先！
行到攰，葉澍堃就入去東薈城唞唞，飲杯凍咖啡，順便同市民傾吓偈，實行身體力行，帶希望畀東涌居民，等佢哋唔會咁易諗埋一邊，𠵱家做局長，真係唔容易。