問十個「黃皮白心」的鬼妹鬼仔，九個都話鍾意食炸雞翼煎牛扒，中菜？食都無興趣，都唔好旨意佢哋識煮！偏偏鬼妹仔Joanne，從細到大都食西菜學西菜，回到香港就開始對中菜情有獨鍾，仲學到一手正宗中菜煮法。現在還可以開班授徒，半個西人教你煮中菜，問你服未？
記者：葉雪芯 攝影：林栢鈞
示範：Joanne 鳴謝：byjoannestylishbaking
酒香鮮美梅酒味噌蒸肉排
價錢：$28/2人份
需時：20分鐘
材料：肉排半斤、日本麵豉醬2湯匙、日本梅酒1湯匙、老抽1湯匙、糖1湯匙、水1湯匙
1.麵豉醃肉
切好肉排，先放入麵豉醬。
２.加入梅酒
再放入日本梅酒、老抽、糖和水。
３.猛火清蒸
拌勻後倒在碟上以猛火蒸15分鐘，撒上葱花便成。
貼士：日本梅酒味道較濃，如喜歡清淡酒味的話，可以日本清酒代替。
甜香惹味紅糟雞球
價錢：$35/2人份
需時：15分鐘
材料：雞髀3隻、青椒半個、洋葱半個、蒜頭2粒
調味汁：紅酒糟11/2湯匙、紹酒1湯匙、生抽/水/糖/油/生粉/麻油各少許
1.切雞球
雞髀洗淨，切成雞球；青椒、洋葱切成方塊。
２.炒至7成熟
燒熱油，先將雞球爆至7分熟，盛起。
３.埋芡調味
爆香蒜片、加入所有材料及調味汁，收緊芡即可。
貼士：紅糟是江南一帶的醬料，是以酒渣所製成，帶有香純酒味，一般在南貨舖如老三陽等可買到。
食猛鑊氣醬爆鴕鳥肉
價錢：$35/2人份
需時：15分鐘
材料：鴕鳥肉6両、洋葱半個、青椒半個、蒜茸辣椒醬1湯匙、紅辣椒1隻
調味汁：酒/生抽/水/糖/油/鹽各少許
1.粗切鴕烏肉
鴕鳥肉切粗條、洋葱、青椒、紅辣椒切幼絲。
２.輕輕炒熟
將鴕鳥肉加蒜茸辣椒醬炒至半熟。
３.回鑊快炒
加入洋葱、青椒、紅辣椒及調味汁料一起爆香炒熟即可。
由零開始
Joanne自小在英國留學，由中學到大學都主修烹飪，但一直只是煮西菜和餅點製作，對中菜的認識可算是零。回到香港，她就加入某大烹飪中心當烹飪導師，她說：「始終香港人都是以食中菜為主，但偏偏中菜方面佢乜都唔識，惟有由頭學起。」
菜刀都唔識揸
「初時連揸菜刀都唔識，切條葱都俾人笑！」，於是佢一於見人就問，無論街市阿姐、隔籬鄰舍，都係佢師傅！學咗兩年，𠵱家已可自立門戶開班授徒！問佢最喜歡邊種中菜，佢笑而不答；不過佢今次選菜一是清蒸、一是醬爆，煮西菜又點會有呢啲玩盡原汁原味、又咁講鑊氣嘅菜式呢！大家如果下次有朋自「遠方」來，不妨喺度偷吓師，一定叫佢哋食到耳仔郁。