科大校長朱經武人氣勁升，除咗搞起霍金熱潮，又獲港府支持開高等研究院，仲啱啱被選為最佳大學校長，撼低港大校長徐立之。八方噚日與一眾行家同佢食晏，聽咗佢好多秘密。
朱經武話好開心獲選為最佳校長，但如果科大可以同時當選最佳學府就更好（徐校長，要小心睇住港大喇）。不過對於呢啲排名，朱校長話唔好信以為真，因為排名高，都唔及得有人提起納米科技就諗到科大。
講開攞獎，校長喺美國做緊實習醫生嘅千金，上個月獲醫院病人選為最佳實習醫生，真係虎父無犬女。朱校長話女兒已經結咗婚，女婿係教師，八方問佢恨唔恨做外公？校長就話個女工作好忙，留返佢自己決定，睇嚟佢係一位好民主嘅爸爸。
父女合作研究大計
講起BB，佢即場爆咗件不雅事件。原來當年個女喺美國出世，嗰邊唔興坐月，朱太有日出街買嘢，留低佢喺屋企湊女；點知BB就喺呢個時間第一次便便，「第一次特別多」，搞到佢雞手鴨腳，唔知點算好，八方聽到好好笑，但由於食緊飯，大家唔好意思問佢點收科。
朱小姐主攻眼科，佢哋兩父女有一個大計，就係研究適合老花人士戴嘅自動調校度數眼鏡，朱校長話技術上冇問題，只係兩人冇時間坐低去做。
做得醫生，自然財源滾滾，朱校長話唔少醫科生入學前，都話讀醫係因為想幫人，但畢業後就掛住搵錢，所以佢教個女一定要記得抽時間服務社會。
朝朝行上山返大學
朱經武今年60幾，睇落仲好fit，但呢排就有啲鼻敏感。佢平時都會盡量抽時間做運動，例如朝早堅持由山下嘅校長府邸，行一條大斜路返山上嘅辦公室；佢又話試過學太極拳，但只學咗十招。
之後佢又爆自己隻腳有牛皮癬，呢個問題困擾咗佢幾十年，最近突然醫好咗。有乜藥咁神奇？原來佢今年初去東京為日本政府審視科技政策，朋友請佢去雪地浸溫泉，之後牛皮癬冇再復發過，所以佢好想研究吓啲溫泉水有乜特別。
不過日本𠵱家出入境好嚴，佢怕貿貿然帶樽水喺身會好麻煩，「𠵱家帶支水喺身，會叫你試吓。」認真幽默。
八方噚日坐喺朱校長旁邊，發現佢嘅右手食指好特別，好似ET外星人，手指頭係圓嘅。仲有佢左手手掌條事業線好長，差唔多伸延至中指，唔怪得佢做咁多次最佳校長啦。
撰文：倪清江