甄子丹前日43歲生日，雖然佢前晚要出席新戲《龍虎門》嘅特別場首映，但開場前都抽時間拖實老婆汪詩詩同家人去咗灣仔譚臣道大歎日本私房菜，而好友雷宇揚同黃家諾都有到，問甄太送咗乜嘢生日禮物畀老公，佢笑笑口話：「送咗西裝畀佢，佢好鍾意衫。」
「覺得佢入硬行」
食完飯後，甄子丹同佢老婆聯同兩歲幾囡囡卓宜去咗銅鑼灣一戲院出席電影特別場首映禮，Soler、姚樂怡、梁小冰、陳法蓉同蔡少芬都有出席，年紀細細嘅小卓宜一啲都唔怕陌生，遺傳晒爸爸嘅表演慾，一到場就擺晒甫士，非常可愛。甄子丹都大讚個女好識擺甫士，佢話：「個女一出世都已經識擺啦，聽到hiphop嘅音樂仲會扭patpat，我覺得佢入硬行，雖然讀書好緊要，但如果佢鍾意入行都唔會阻止。」問到小卓宜送咗乜生日禮物畀佢，甄子丹就好冧咁話：「佢今朝一早就同我講HappyBirthday。」就算冇禮物，單係一句說話都登時令到鐵漢甄子丹馴如羔羊。
