餐廳羅話要搵盛智文出面代表餐飲業反對GST，唔知會唔會成功。如果易地而處，左丁山係盛智文嘅話，一定閉口不言，絕不公開發表意見支持政府，以免得罪同行，被視為叛徒，但亦唔會反對，免特區政府難堪，咁高地位嘅人物，有啲政治手腕嘅。
香港人好鍾意出外吃飯，故此快餐店大家樂、大快活賺大錢，高級嘅鏞記、陸羽，生意不愁，中環翠華更滿座足足二十四小時。餐廳羅以為佢知道其中深層理由。餐廳羅話：「香港稅率雖低，其實計埋隱藏性、間接性嘅稅率，唔算低。香港政府絕不賤賣土地，正是羊毛出在羊身上，政府透過地產商向香港市民徵稅。一幅地皮值一百億，你估地產商識得印銀紙呀！只不過係起樓分層出售之後，連埋成本利潤，你同我分二十年期供樓，畀番一百億政府之嘛。我哋一般人住嘅樓，面積不大，實用面積更細，廚房小得可憐，如果喺屋企請客，或一家大細兄弟姊妹父母一齊食飯，直情逼爆廳房。有此原因，逢周末假期，香港人一家家咁出外食飯，平時應酬，又係出外食飯，養成習慣之後，即使係大富豪，除非請至愛親朋及VIP，都會喺酒店/會所食飯。」
「外國情況完全唔同，屋大，廚房大，老友在家裏請客，平常到極，等閒佢哋唔會出街食飯，以免交GST。如果香港有咗GST，香港居民變咗受三重徵稅：（一）薪俸稅；（二）供樓（內含奉獻畀政府嘅地價）；（三）GST。連出外食餐飯都要交稅，剝削香港人生活習慣之餘，好影響我哋餐飲業嘅利益，一於反對到底，如果有人搞上街示威，我會搵好多人支持。」
餐廳羅講得啱，左丁山識得咁多老友，除咗一啲住喺山頂、渣甸山、加多利山嘅朋友之外，冇人請過左丁山返屋企食飯。大家見面，唔係去會所就係酒店。左丁山二十年來都冇請過朋友返屋企食飯，因為屋企細吖嘛！香港年青人結婚，好多時都係冇飯（模範）夫妻，太太唔識/唔肯煮飯，情願幫襯大家樂/大快活，咁都要交稅嘅話，好冇癮。