重要宣布！今日係呢個欄目最後一期，以後想知咩書有咩送有咩講就唔該行多兩步，自己巡吓日本書舖。
其實港男港女最愛追嘅都係日本潮流，雖然大部份睇嘅人都唔識日文，但係齋看圖唔識字都唔介意，因為可以學吓人哋嘅襯衫方法，至少都知㗎仔㗎妹興着咩。再唔係睇吓SnapShot，睇吓日本街景都可以一解相思之苦，所以每次見到新書到港，都忍唔住手買番兩本揭吓。加上日本書成日有嘢送，等本書過咗期先買就最抵不過。講開又講，橫掂最後一次，唔爭在鬧吓人，啲舖頭成日寫明送嘅嘢無得揀，但係我夠膽講句，我次次！永遠！都得唔到自己想要嗰款！疑心重嘅我只會懷疑書店啲人落咗手腳，又話無得揀，但係自己就收埋晒啲靚款益自己友。如果你哋無做過嘅，我同你哋講聲Sorry，當我自己唔好彩，但係萬一我估中，唔該你哋自愛啦！蠱蠱惑惑邊有發達㗎！你做乜唔諗吓嗰啲一心諗住自己可能抽中靚款嘅客人嘅心情？雖然唔係大數目，但係都係欺騙人，天收㗎！
講開唔爭在講埋，旺角、太子都有幾間日本書舖好近吓，我就抵唔住頸下下都行晒附近幾間格完價先買。因為曾經試過喺樓上買咗本AirMail赤痛版，之後行經地舖嗰間，即係啲舖租明顯貴啲嗰間竟然賣平廿蚊！嗰一下真係好難受，唔係錢嘅問題，錢我大把！係唔抵！我慳番嗰廿蚊攞去買六合彩，隨時中，隨時改變我嘅一生㗎！