譚香文噚日朝早9點，就帶埋公民黨兩位區議員，同民政事務局常任秘書長林鄭月娥會面。公民黨其他核心成員，好似余若薇、湯家驊、梁家傑同吳靄儀等四大狀就通通冇晒影，聽講大多數去晒放假。Mandy就話件事係佢負責嘅，所以要出席，抗議政府唔取消區議會委任制，阻礙民主進程，仲交咗份13頁嘅意見書畀林太，叫佢同煲呔反映吓。
今次係佢第一次同林太傾呢個議題，不過一個小時嘅會面，雙方都達唔到任何共識，但Mandy同林太都係講道理嘅女人，所以會面冇咩火藥味，佢仲大讚同林太嘅對話氣氛良好㖭。
但係Mandy同八方呻：「其實班市民都唔係太關注呢件事咋。」可能市民擔心緊2012年係咪有雙普選多啲，區議會咁低層次，咪冇人關心囉。