潮流興去新加坡學嘢。話說上個禮拜獅城搞咗個大規模禽流感演習，非常大陣仗，請咗好多地方嘅衞生官員去參觀，香港都派咗個曾先生去捧場，當然唔係曾特首，而係衞生防護中心嘅顧問醫生曾浩輝。
八方咁啱同佢同一班飛機返香港，順便問吓佢有冇去幫襯黃亞細，食唔食到煲呔都冇得食嘅肉骨茶？
曾醫生話，冇特登去邊度搵飯食，亦都冇食到肉骨茶，佢哋都係落到街見到有乜就食乜。呢位沙士神探又真係幾平民。
講番衞生，原來新加坡同香港都幾有淵源。曾醫生話，港大、中大醫學院以前冇公共衞生呢科讀，所以佢哋啲醫生好多都要去新加坡讀，好似陳馮富珍都去過，佢哋嗰邊好多老友，但後來港大、中大都有開呢科，新嘅醫生就唔使再遠去南洋。
佢又話，今次喺當地參觀過機場、醫院同港口等，仲睇咗點隔離懷疑染病嘅旅客，對香港都幾有參考價值喎。