大大話話已經寫咗10多個「Blog」，今日進入最終回，正好留一個機會懷念一位朋友，這位朋友陪伴我一起成長，她扮演過大雄、三杉淳、火野麗、柯南、姆明、亂太郎、風見車人、孫悟空、四驅郎、Q太郎、嘉德里奧等等角色，她叫做盧素娟，是無綫電視的配音員，80年代起一直是無綫電視的全職配音員，專負責動畫、電影同一啲外購劇集嘅粵語配音工作，從今起再聽唔到佢嘅聲音，我心愛嘅動畫人物都一同變成啞巴，因為上星期她因癌症去世。
一直認為配音工作好偉大，因為語言問題，角色嘅靈魂都由配音員注入，自己小時候已經將電視校至最細自學配音，從中更學懂扮米奇老鼠、唐老鴨等等特別聲效，早年曾參加某某電影學院舉辦嘅配音課程，雖然最後沒做成配音員，不過令我明白到不少此行業的辛酸：你好可能同女友吵架、家庭問題而心情低落，不過你對住配音稿，你都要投入角色，同卡通人物一同歡笑，個人認為最難的就是配哭、笑聲，要配得神似的確難度超高。現在每天我都會睇《多啦A夢時光機》，好懷念《430穿梭機》的時代，雖然叮噹已經改名，不過在我心目中，叮噹、大雄、技安、牙擦仔、靜宜，呢啲先係你哋真正嘅名字。