關你車事：2,000轉Turbo發行力一條街唔夠佢威

Vicky同我講最近上網終於搵到個心儀目標，大讚話佢啱啱先由瑞典返嚟，外表成個富家子咁，個樣靚仔又斯文，而且好有內涵，掂吓佢都發行力，無時無刻帶畀佢無上嘅快感，吓……我都想知係何方神聖咁巴閉，一於約佢出嚟見見面先！
記者：黃婉冰
攝影：林栢鈞
Model：Vicky

外表斯文Turbo驚人

相約Vicky睇佢個心頭好，哦，原來係紳寶架「大T」9-3。
「普通料啫，Nobigdeal!」再望多眼，無咩跑車元素，又有幾Sporty呀？你呃我。Vicky見我半信半疑，即刻話同我「鍊」番一轉。由灣仔去大浪灣，開始時覺得幾舒服，同一般歐洲房車沒甚麼分別，但離開市區，駛上東區走廊時，成架車突然好似跑車上身，先是Turbo發力嘅叫聲，跟住係一股無形力量由背脊將我向前推，好明顯，呢下「推背」係嚟自嗰副全新嘅V6Turbo引擎，真係估唔到，外表斯斯文文，原來發起火嚟非同小可，去到大浪灣，乘坐感唔錯，避震、懸掛舒適度、隔音等同歐洲房車無異，但快車時又好似坐緊跑車，以乘客角度嚟講，前後座舒適度同樣「趴時」。
坐都已經咁，揸一定好有滿足感，換由我做司機，大浪灣直驅返灣仔，坐咗4個人，起步輕而易舉，350Nm扭力果然有料到，轉數一到2,000轉，Turbo開始發功，一路踩油，一路聽住陣陣低沉嘅引擎Turbo聲，見彎入彎，懸掛感覺又真係幾鬼亢奮，但當我沉醉在高速飛馳時，突然傳來「噹、噹」聲，原來係車速「警報器」，為免犯法，只好收油，但後來俾我發現，「警報器」係可以Reset，最高可以Set到230km/h，嘩，正。

半自動波箱反應敏捷

「9-5我都鍾意，但速度感始終唔及呢架咁澎湃。」呢個Point我都同意，如果唔係，廠方都唔夠膽話呢部係紳寶最快嘅房車，唔驚俾人Challenge咩？不過咁，雖然話有晒Turbo又有成2,800c.c.，但揸到上手一啲都唔覺好難「馴服」，尤其是佢個Sentronic半自動波箱，夠敏感，每逢高速後再入彎，拍低一個波，成架車即刻略為收火，入直路再拍高，成架車又再上電一樣，軚盤有+/-推桿，雙手並用定係單手轉波都任君選擇，難怪連細細粒嘅Vicky都可以搞得佢掂！

內櫳設計「撞」得「出色」

女仔買車至緊要靚，今次9-3正中Vicky下懷，鮮紅車身勁Sharp，內櫳夠Young。「我本身好鍾意鮮紅襯車款，另外佢內櫳撞色撞得幾好，好似皮椅咁，杏色用黑色點綴，唔會好誇張，連個軚環都用磨砂鋁襯皮，手感都幾好，但其他設備就同以往分別不大，好似天窗、中控台、Memoryseat咁，又稱唔上特別豪華，我自己就覺得夠用已經OK。」