近年香港動作片大大減產，近一年記得的就只有《殺破狼》比較成功，反而外國人拍攝嘅動作電影都開始標榜100%打真軍！年前一套《因乜差事跳跳跳》（YAMAKASI）不知不覺間改變咗一班年輕人，經過年多時間訓練，最近他們開始活躍於本地各大討論區，組織不同朋友參加動作活動。隨街跳跳跳，玩嘅就叫Parkour，原來普通人經過訓練都可以變成成龍同TonyJaa！
記者：羅灝汶 攝影：陳盛臣、周旭文
《因乜差事》Parktour經典
《因乜差事跳跳跳》（YAMAKASI）、《因咩差事跳多跳》（LesFilsduVent），真有其人?!《YAMAKASI》絕對是Parkour最佳示範電影。YAMAKASI是薩伊的班圖語，意思係探索人類潛能;激發身體及心靈極限嘅一種哲學，參與嘅朋友都想成為心靈、體格超強嘅強人，現實中YAMAKASI是一個Parkour團隊，主要有7位成員，他們依然係世界上最頂尖的Parkour高手，當中更有亞洲人。最初成立是7個從小玩大的好朋友，一齊玩、一齊跳，慢慢開始挑戰自己個人極限而發展成現有的Parkour模式。他們亦表示透過體能訓練可以變得強壯、保護家人，但絕對不鼓勵人動武。
源於法國
Parkour最早源於80年代嘅法國，2002年開始盛行於英國，因為電影《因乜差事跳跳跳》（YAMAKASI）關係開始傳到全世界，Parkour又名FreeRun，開發人係來自法國嘅DavidBelle及SebastianFoucan。睇過佢哋嘅表演，你會見到佢哋飛簷走壁，由地面徒手爬上10樓，再打住觔斗咁落番地面，好似學咗古墓派輕功。DavidBelle父親係一位軍人，佢受到父親嘅啓發，從而開創出Parkour這種運動，而David曾經係YAMAKASI成員，YAMAKASI亦係佢一手訓練出來嘅團隊。David現正進軍電影界，曾經主演過電影《Banlieue13》，而Sebastian就為Parkour加入了哲學思想，佢受到了亞洲人思想影響，開創出新嘅哲學「自由理念」，現在Sebastian已經成為了Parkour這項運動的國際代言人之一。
靠長期訓練
香港咁細小，點解都有年輕人想學玩Parkour？上過電台接受訪問嘅Parkour玩家阿鋒：「香港人其實早於80年代前已經由成龍接觸Parkour，因為戲中都包含咗逃走、跳躍、攀爬等等Parkour動作，不過正式Parkour基本動作都係由法國人一手設定。」Parkour這個字解作「parcoursducombatant」，意思係障礙物課程，而玩家就稱為Traceur。阿鋒：「其實現時Parkour可以分為玩花式同跨越呢兩大類，後者就主要玩PointtoPoint，即係由PointA去到指定目的地PointB，當中要包含不同Parkour技巧，唔係一定要打晒前、後空翻先算成功。」想由高處落地同跳躍，當然係靠長期訓練，冇專業朋友在旁就唔好亂試，阿鋒：「我地從來冇試過嚴重意外，因為Parkour嘅基本動作就係教識你保護自己，聽聞外國有人死傷都係玩過火。如果普通公園玩問題唔大，警察都只會問兩句，不過跳屋頂就真係會犯法，唔好試！」
武指世家成立港版YAMAKASI
互聯網發展迅速，絕對幫助咗推廣Parkour呢種街頭運動，筆者瀏覽某論壇網站，就見到有一群叫做Zippies嘅年輕人舉辦Parkour交流活動，主腦人German只是20出頭，佢聯同一班醉心武術動作嘅朋友成立ZippiesClub，「我自己的爸爸、叔叔都係武術指導出身，我從小就接受訓練，玩Parkour時間唔係太長，不過基本動作已經無問題，我哋希望透過活動去令到一班年輕人一展身手，所以希望組織一班對『自由運動』有興趣嘅朋友，互相交流。」筆者採訪當日，正是ZippiesClub第一次舉行活動，除咗5至6位主腦人外，其他人都係來自網上論壇，而且當中不乏女生，團員當中有懂得跆拳道、空手道、國術、巴西戰舞等等朋友，希望將不同技術加入Parkour當中咁話。
Lelia（文職/2×歲）：「我有玩國術同巴西戰舞，上網見到佢哋搞Club就參加試玩，我好想學到跳車同踏牆後空翻。」
Casper（特技人/18歲）：「我玩運動已經有8年，之前入咗跆拳道港隊，Parkour等等動作對於有體操根底朋友有好大幫助，訓練方面一定要有系統，亂試會好危險。」
主腦人German（動作指導/21歲）：「我接觸武術就好耐，Parkour都係近期開始玩，我哋想將不同動作元素加入去，希望不同年齡有興趣嘅年輕人都可以參加。」
Samson（學生/19歲）：「識朋友參加呢個Club，我玩Parkour都只有2個月，我哋想將唔同元素加入去，可以集結唔同技術。」
中學生網上結識街頭實戰
除咗有年輕人搞ParkourClub外，原來都有其他年輕人私底下模仿電影動作，個個都係睇完《因乜差事》透過網上認識，而決定加入Parkour行列。動作靠自學，每星期都會搞3次訓練，主要都係體育館內熱身後，再去公園實戰，不過個個年輕人都怕畀屋企人知道，因為呢項運動始終都有危險性，經常撞傷跌瘀，有人就話自己踢波撞親，有人就話自己行街仆親。其實玩得Parkour都係有專家教路比較好，同老媽子申請時，都可以令佢放心啲啦。
阿Lap（學生/18歲）
