一生之中，究竟有幾多件事情係同冧巴有關？生日、身份證，簡直數埋手指同腳指都數唔晒！但講到揀手機號碼，獨特之處在於可由你決定，小記日前就採訪咗堪輿學家麥玲玲師傅，佢話揀靚冧巴原來係有竅門㗎，秘訣就在於頭尾嘅數字關係！
記者、攝影：陳國輝
「668」利金融業
本地網絡商3HK最近就首創利用手機揀冧巴嘅服務，只要直接登入3G網頁，即可透過「幸運輪」攪出你嘅心水號碼，同傳統上揀手機冧巴嘅方式比較，唔單止慳番啲走去門市嘅腳骨力，最特別係網絡商已「預先」留定一組靚冧巴畀你──就係「668」字頭！從風水角度講，麥師傅話「6」屬金、「8」屬土，因為土生金，卦象表示有進財之意，有利地產、保險及銀行等金融業，如果尾組數字都係靚冧巴嘅話，運勢仲會再強勁啲㖭！但基於每個人嘅五行所屬、出世月份都唔一樣，真正運勢有幾厲害，就視乎個人而定。
春夏出生旺銀黑
除咗手機冧巴，麥師傅仲教大家點去揀手機顏色。「根據每個人唔同嘅出生季節，簡單嚟講，春天出世嘅朋友最適宜用比較閃嘅金、銀色；夏天出世嘅朋友，就適宜用藍或黑色；至於秋天出世嘅朋友，則適宜用綠色；而冬天出世嘅朋友，最好就用較搶眼嘅紅或橙色喇！」聽師傅咁講，查實現時最大路嘅手機顏色，都集中喺春、夏、冬3個季節，至於咁係咪代表秋季出生嘅朋友，就要學師傅話齋去換手機？當然，風水始終未有科學根據，小記都係嗰句：「信則有，不信則無。」
收費：每次扣除一個「M」
查詢：3香港（31628888）