魚、斌、尉遲一死，２囉嗱、Gin歿，瑩瑩、ahmi、錄合採斃。今日是《Flu》收皮的日子，天下同聲一哭。
還記得《Flu》剛見報，豬朋甲問：「Flu乜春呀？」我解釋：「Flu即係流感，引申成潮流咁解呀。」狗友乙搭訕：「X！咁叫潮流版咪得囉，懶型咁托咩？」我不忿被寸：「畀啲文化得唔得？個字又唔係深，你次次扮病唔返工，攞嗰張醫生紙上面都有呢個Flu字㗎，咪當學多個生字囉。」豬朋狗友齊寸：「懶型就多Q餘無料到喇……」《Flu》逢周六見報、逢周五排版、逢周四要齊相齊稿，逢周四就是以上８位死者的受難日。記者要趕稿，編輯要改稿起大題畫版，往往做通宵，有時下班回家已天亮，入門撞着剛睡醒的娘親，娘親總會問：「又搞嗰啲『呼』呀？唉，『呼』嚟『呼』去都唔知你搞乜？」雙親是上一輩人，不碰電腦不上網，就只愛閱報。一份報紙，港聞娛樂馬經體育連廣告，日日夠他倆磨蹭3小時，就唯獨周六的副刊，完整的一叠擱在廁所水箱，原封不動。
三數月後，再與豬朋甲狗友乙蒲吧，席間有人重提《Flu》，「你哋搞嗰叠《Flu》又幾X過癮喎，講吓潮流又講吓玩具，連我條女都話OK好睇。」「你哋連《以和為貴》都玩埋喎，勁喎……點解唔日日出呢？」我只拿起骰盅喊一句：「6個6，有無圍骰？無就清咗杯酒……」繼續猜枚懶得答。我想說的是，好看與否，別因一個版名太早下定論，《Flu》這名字懶型？對呀，我們就是要標奇立異。我膚淺，我認為做報紙，引到讀者閱讀就是成功，至少豬朋狗友說得出我們的版名，娘親知道我捱通宵做「呼」，總好過某些報紙日做夜做、月做年做一世做，做來做去也不知自己做甚麼。