祖雲達斯日前決定就假波案裁決上訴到意大利奧委會，誓要一洗污名咁話；但幾乎喺同一時間，體育法庭嘅法官辛杜利就透露明明祖記斷到正，唔明點解對方仲怨天怨地，即係暗示對方唔知足，呢番話都算向「老婦人」踩多腳。
直到目前為止，辛杜利仲未正式宣布上訴裁決嘅理據，但前兩日接受傳媒訪問時就透露少少，例如講到前祖記總監莫治好明顯犯法，反而其他3間球會嘅罪行就間接得多，所以祖記點打都打唔甩，好奇怪佢哋上訴獲減刑後仲咁多聲氣。
尼維特矢志效忠
家陣祖記決定嘈到去國家體育權力核心──意大利奧委會，件事愈鬧愈大，𠵱家已經唔再由辛杜利裁決；但呢個時候咁講嘢，對祖記當然係無好處，變相向人家判死刑。我求大俠睇過唔少關於今次假波案嘅資料，發覺好多證據都對祖記不利，罪名難打甩；再講，當日有傳祖記會被降落丙組，佢哋嘅代表律師向法官求情時都話降落乙組較合理。𠵱家求仁得仁，見拉素、費倫天拿唔使降班就決定再上訴，真係有啲「貪」。
講開祖記，正當班波嘅陣營氣氛好極有譜，中場主將尼維特就重申會效忠到底，踢祖記踢到退休，總算係一個喜訊。
「祖雲達斯嘅罪名應該大過其他3隊，告到去奧委會都未必有用，辛杜利今次嘅講話唔多唔少有影響力，祖記球迷更加應該打定輸數。」