世界盃落幕唔夠1個月，周不時聽到身邊波友話餓波，唔緊要，幾個電視台由明日開始鬥出招，百花齊放令季前直播波比以往更多，包你睇到滯。球迷捱眼瞓嘅日子又開始囉。
狂播利物浦熱刺比賽
嚟緊幾日，「現在」、「三色收費台」會播率先開鑼嘅蘇超聯，而「三色收費台」亦播一啲球會級比賽；至於一向勁播波嘅「收費台」當然唔執輸，我求大俠噚日收到佢哋未來半個月嘅播波節目表，都即時嚇咗一跳，除咗一貫嘅阿積士四角賽、德聯盃之外，連草蜢對利物浦或者熱刺對皇家蘇斯達等等嘅球會友誼賽都有得睇。
「收費台」主打播英超，季前熱身賽自然圍繞幾支球迷所熟悉嘅英超隊，包括利物浦、曼聯同熱刺。不過，聽聞佢哋今個夏天偏偏冇得播「倫敦雙雄」車路士、阿仙奴嘅比賽，唔知係因為呢啲球隊嘅比賽太貴，抑或係熱刺愈嚟愈得球迷歡心，索性播多啲呢支「倫敦3哥」嘅比賽呢？
意甲方面，「收費台」今夏集中播國米嘅比賽。雖然國米未必係大部份球迷嘅心頭好，但話晒都係出爐嘅意甲聯冠軍，總算有睇頭。講時講，我求大俠都幾想睇降班後嘅祖雲達斯，如果得，季前友賽都照殺。
「好明顯，電視台競爭激烈，多波睇對我哋呢啲餓波之人係好事；不過，要畀錢嘅就做晒嘢，唔知唔收錢嘅電視台又會唔會做番多少少呢？」