打工仔最開心梗係升職加人工，今次要恭喜嘅係利嘉閣12位管理層，職銜升咗一至兩級，戥佢哋高興。今次利記嘅升級騷，增加多咗兩個新職級，就係助理區域董事同埋高級區域經理，總共有6個人坐正，中高層管理架構進一步向橫發展。
坐正助理區域董事3位，分別係陳詠嫻、姚偉基同埋陳潤琪，不約而同都係由原先嘅區域經理，連升兩級，港、九、新界各佔一席。至於同樣都係區經嘅宋良安、徐子豪同埋郭兆輝，出任新設嘅高級區經。
另外，有5位分行經理，銜頭多咗個高級字樣，分別係北角城市花園嘅黃龍智、鰂魚涌逸樺園嘅丁培鴻、馬鞍山廣場嘅黃溢霖、大圍嘅黃偉基同埋荃灣南豐中心嘅蔡詠玲。最後1位幸運兒，就係跑馬地嘅張德昌，由分行經理連升兩級出任助理區經。