仲記得喺舊年E3，睇到《DEADRISING》已經印象深刻，事關嗰種萬人空巷嘅大堆頭場面真係唔講得笑，加上嗰班都唔算作人而係喪屍，絕處逢生難度仲誇張過手執槍炮嘅《Bio》何止N倍！如今真係要講香港玩家極之有福，因為就算美國佬都要8月尾至有得玩呢隻血淋淋正嘢，我哋卻可以全球率先玩到，呢勻絕對係本地機迷之福呀！
文：陳福榮
咪以為《DEADRISING》仲老套到似《Bio》邊行邊走執嘢辣「喪B」（Zoobie，喪屍），佢已經昇華到幾乎堪稱為血腥暴力美學；怒舂爆頭、血花四濺、群屍狂咬甚至用刀一分為二比比皆是，頂唔順真係隨時嘔得！結果搞到向來前衞嘅德國都頂佢唔住，要求廠方Cut晒啲核突嘢至畀你賣，例如將喪屍改成機械人等。唔係啩？變做機械人咁難諗都畀你諗到？雖然件事咁搞笑，但證明隻Game嘅暴力同血腥係幾咁誇張。
周街執嘢做武器
著名遊戲創作人稻船敬二（《鬼武者》之父）講過，《DEADRISING》構思來自幾年前一部翻拍西片《活死人空間》，因此故事骨幹、版圖模樣都熟口熟面。不過更啜核係身為記者嘅主角FrankWest，得悉科羅拉多州嘅Willamette因某啲理由被隔離，於是潛入市內追查，結果就同成班居民齊齊做咗喪屍點心，被迫衝出重圍，以求捱過九死一生嘅72小時（遊戲設定時間）。
主角冇強力武器喺手，所以樂器店結他、裝修工具嘅大槌、餐廳用嚟載嘢食嘅碟甚至保齡球，都可隨手執起對付咬人嘅喪屍，為保命可謂不擇手段。
影佢點死有分加
其實呢隻Game頗受《GTA》影響，同樣有升級加個人能力設計，透過賺取PP（PrestigePoints）嚟提升攻擊力、速度、生命力、可持道具數量和投擲敵人距離等。除殲滅一定數量喪屍以及完成指定任務可賺到PP外，仲有好多過癮方法攞分，如尋找「死剩種」後帶到安全地點、善用各種設施如煲熱塊平底鑊或做吓Gym都會有分加，認真無厘頭！仲有用特殊技巧嚟解決喪屍都能獲得更高分數。最頂癮係發揮攝記本能，影張沙龍相，喺無辜市民成為喪屍午餐前嘅一瞬間，只要愈接近埋牙、愈多喪屍入鏡咁就賺到更多分，即係話要睇住佢哋死先安樂！
PROFILE
遊戲類型：AVG
對應機種：XBOX360
遊玩人數：1人
開發廠商：CAPCOM
推出日期：8月8日
行貨價錢：$388
