重磅股帶住指數上，恒指彈升近300點。恒指、H指與紅指，總共有成份股102隻，下跌嘅只有9隻，股民當然係富貴者多，閉翳者少。升幅超過3成嘅窩輪，大約有40隻。
中電信C輪9135：中移動（941）升5%，收49.30元，高追中移動C輪，過唔到心理嗰關，不如諗吓同類股嘅C輪。中電信（728）收2.56元，升4仙。中移動咁升法，中電信都唔會冇運行，搵中電信C輪玩短線遊戲。
正路對象9135，12月初夠鐘，輪價16.2仙，溢價9.1%，槓桿率15.8倍（有效7.9倍），引伸波幅29.2%。
有隻9843，壽命短啲，槓桿率細啲，但慳番好多溢價，但成交金額得10萬銀多啲，好難買賣，嘥氣。呢隻數據靚啲，所以昨日升幅（17%）大啲。
網通C輪9704：網通（906）係少數下跌嘅恒指股，亦係下跌嘅紅指股，收14元，唔見0.10元。有機會跟埋中移動上番去，細細注搵隻C輪炒。的確係只能細細注做嘢，因為網通C輪交投唔得活躍，最旺門嘅9704，成交金額都只係172萬元。
9704今年12月初到期，輪價19.9仙，溢價6.2%，槓桿率7倍（有效4.9倍），引伸波幅38.3%。講數據，最靚係呢件。其他交投比較疏啲嘅，溢價有超過25%，買落去，過多一陣，就會覺得後悔。
章盛