早年經商的阿發，數年前遭拍檔捲款逃走，淪落街頭。現靠領綜援的他，屢次求職碰壁，曾有機會投身中港客運工作，奈何未有相關牌照而告吹，希望有機會「考牌」，讓他可以自食其力。
揸車搵食逾20年
說到錯失重投職場機會時，阿發大感可惜。他說：「我一直都係揸車搵食，私家車、貨車同巴士加埋都超過20年。早排有個朋友介紹我去揸皇崗嘅旅遊巴，點知我就係冇錢考個大陸牌，所以做唔到呢份工！」
48歲阿發強調，以其駕駛經驗足可應付旅遊巴工作。他說：「我揸咗巴士咁多年，揸旅遊巴點會有問題。不過根據法例，我就要先畀510蚊，去運輸署排期，示範操控『棍波車』嘅能力，先可以喺香港揸載客嘅旅遊車；另外入大陸境，要考個中國A牌（即大型客車），加埋要成6,000幾蚊，但我𠵱家食緊綜援，邊有咁多錢！」
自言北上創業遭騙財的阿發，一度露宿街頭。他說：「99年我將積蓄加上借信用卡，夾埋幾十萬，同朋友喺深圳搞飲食。我只出錢，平時喺香港揸巴士，點知個朋友就呃我不斷投資，03年就攞晒啲錢走，搞到我破產同無咗巴士份工，衰到喺街度瞓咗兩年！」
雖然營商失敗，令阿發一無所有，但他始終希望自食其力。他說：「之後都係靠打散工，揸車同廚房洗碗乜都做，終於上個月捱唔住要攞綜援。我一得閒就喺勞工處搵工，好似呢個月，試過超過20份工，但全部都係叫我等電話，冇回覆！」
安排撥款6,180元
阿發希望能考取中國牌照，有信心取得資格後，可以脫離失業行列。蘋果日報慈善基金本着助人自助精神，現正安排撥款6,180元，協助阿發報考有關駕駛課程。
捐款編號：C2108