上星期五講反對GST，臨尾話：「相信會贊成嘅，只得會計界人士，有咗GST，佢哋嘅生意一定大大增加。」呢句話係有根據嘅，因為一啲會計界名人如羅盛慕嫻、雷添良、王銳強、陳茂波等都表態支持。
馬主N係澳洲會計師，佢就好反對，佢對左丁山講：「我喺澳洲久受GST之苦，直情煩到嘔，浪費不少精力，只為填表核數，對真正GDP增長，完全冇幫助，香港有樣學樣嘅話，只會害咗自己。」馬主N喺香港冇從事會計業務，梗係咁講啦。想唔到接咗一封讀者電郵，申報係會計師，講：「我是會計界人士，行內朋友私下閒聊，大家都反對開徵銷售稅，平時HKICPA對有爭議事情要求會員投票，這次還未有，所以我相信行內未有共識。」如果係咁，會計界議員譚香文，以及競選輸幾十票畀譚議員嘅現任HKICPA會長陳茂波就應該快啲諮詢全部會員意見嘞，以免發言時違反選民意願。
呢位會計師話佢回港之前，在加拿大工作十年，深受GST和省稅（每一個省各自抽稅）合共15.5%之苦，但加拿大嘅福利好到冇得頂，當地人交稅多亦冇乜怨言，香港環境完全唔同。左丁山未試過移民，最鍾意香港稅制簡單，生活自由，如果曾特首、唐司長將香港稅制愈搞愈複雜，以香港人作風，逃稅避稅嘅情況，肯定多過澳加幾倍，益晒廉記與稅務局與海關擴充編制，浪費納稅人金錢。會計界人士反對GST嘅話，請踴躍投函報紙，發表反對文章，亦請你哋寫信畀譚香文、陳茂波，表達反對嘅意見。
餐廳羅唔係會計師，反對得更激烈，想話寫信畀蘭桂坊之父盛智文，請佢為蘭桂坊及餐飲業着想，帶領餐飲業反對GST，問佢點解唔搵餐飲界議員張宇人，佢話：「特區政府可能更重視盛智文喎。」呢位先生𠵱家好紅，憑搞活海洋公園砌低廸士尼，可能攞到金紫荊，隨時做埋旅遊局主席㖭，如果佢仲有時間嘅話！咦，咁就有啲驚嘞，盛智文會唔會反對特區政府呢？