朋友問我有冇去「迫」書展，用到個迫字大家都心中有數，一定係講人山人海。
記得好多年前我哋話去工展會睇有乜新產品，𠵱家就話去書展睇有乜新書。當然，仲有就係睇人、聽人講嘢。金庸一出就吸引咗四千幾人。仲有彭定康巡迴為新書簽名，去到邊就威到邊。
所以呢個星期香港都算有番啲文化。灣仔地鐵站內廣告位差唔多俾本地作家佔據晒。連便利店都代售入場券，咁可想而知書展喺商業上係成功嘅。
多咗人買書係好事。有人話只不過係漫畫、流行文學嘢啫，我又唔係咁睇。閱讀呢種習慣係要養成嘅，只要你肯睇，終有一日你會揀到一本影響你一生嘅書。
我哋班香港作家都係睇書大㗎。所以書展人群中一定會有未來嘅大作家。其中一個可能係你。
你想有好嘢睇咩？買佢哋啲書囉。
講開睇書，不妨介紹一本書展未必有嘅英文書《WhyRead?》，作者係MarkEdmundson。書名好易明啫：點解要閱讀？如果有人咁問你，你會點答呢？
作者係美國大學講師，內容亦唔算淺，最啱係教師睇。書裏便提到一個例子。有個中學生好鍾意StephenKing，睇過晒呢位KingSir嘅作品，但係佢個老師就睇唔起StephenKing，認為應該睇WilliamFaulkner，因為有宇宙性。
跟住大家𠵱家見到面都面左左。
作者話個老師其實可以咁講：「阿King嘅嘢係娛樂。如果你想佢啟導你嘅人生價值觀，咁佢未必幫到你。WilliamFaulknen可以。」
作者建議大家一定要睇文學名著。
透過文學作品，你會明白自己多啲，甚至改變自己。
最近出咗一類書，叫做乜嘢死亡前一定要去嘅地方、一定要做嘅事等等。如果我哋同呢個世界講拜拜嘅時候竟然冇睇過一啲應該睇嘅書，咁就真係「絕對空虛」。
中國四大名著你睇過未呢？莎士比亞？……。
呢啲書周圍都有，全部等緊你去睇。
觀火