大角嘴港灣豪庭減價散貨，嚇到班二手業主無覺好瞓，點知世紀21仲要加多兩錢肉緊，出咗段新聞稿，標題「港灣豪庭二手業主恐慌拋售，開價低於沙士，外區客即時轉租為買」，內文話港灣1座中層A室，477呎，原業主減價15%，以161萬沽出，呎價3375蚊，比03年沙士期間買入價164.8萬，仲要平3.8萬蚊。
沙士期間買入嘅單位，由幾十萬嘅樓仔到幾千萬嘅豪宅，之後幾時轉手，斷估都唔使蝕賣。翻查沙士期間港灣豪庭嘅樓價，呎價低至2500幾蚊，再睇番土地註冊處嘅成交紀錄，原來呢個單位係02年1月買入，只不過係喺03年5月完成交易，既然唔係沙士期間入市，𠵱家蝕讓離場都唔係好出奇，世紀21咁樣嚇班業主，真係唔應該。
講番個單位，買家都算執到筍盤，以1座單邊樓王計，成交價比同類平咗十幾個巴仙，買家原以月租7000蚊租緊港灣豪庭同類單位，𠵱家轉租為買，分30年還款，供平過租。