鍾意同班Friend上登打士街高氏大廈嘅上樓Cafe，每次未行到大廈門口已經有大班靚女圍住我派卡片，「試吓我哋呢間Cafe吖！」「上去飲杯嘢吖！」搶客情況都咪話唔厲害，其中一個靚女小雪話：「夜晚有成10個女仔一齊派卡片，都會爭客㗎，但就未試過有拗撬。我哋成班女仔晚晚見晚晚傾偈，好Friend㗎！」見小雪幾好傾，一於去佢間Cafe試吓，但係……點解唔係帶我上高氏大廈嘅？「我間Cafe上個禮拜喺創興開分店，嗰邊少人去，所以我要過番嚟呢度，再帶客過去囉。」
路程短短5分鐘，但30幾度高溫，行多兩步都汗流浹背，小雪話：「夜晚多客，半粒鐘要行五六轉，好彩我哋係輪更制，每次只係企30至45分鐘，都未算好攰。」無人接卡片又點先？「都慣晒啦，唔會唔開心喎，好多人都當我透明，唔接我哋啲卡片㗎喇。」最後一個問題，點解派卡片唔派傳單嘅？「卡片印得精緻啲，細細張方便放入銀包嘛。」有道理，望吓小雪派畀我嗰張卡片，原來早已放入自己銀包入面。記者：黃若茵
泡沫朱古力咖啡$38
賣相好靚，底層順次序係朱古力漿、奶、Expresso，面層就係泡沫，攪勻咁多層飲，朱古力咖啡味道香甜。
西瓜蘆薈特飲$38
蘆薈溝鮮榨西瓜汁，粒粒蘆薈肉好爽滑，清新健康，最啱當夏天消暑凍飲。
小食拼盤$45
好足料，有齊帶子、魚手指、蟹箝、咖喱角等7款唔同小食，客人仲可以自選小食，好有彈性㗎。
蒲友點睇
FullHouseCafe（31885272）
地址︰旺角砵蘭街179號寶倫大廈1及2樓C室