大企業最緊要係聲譽，有獎攞絕對唔會收收埋埋，好似花旗集團咁，噚日就廣發通告，話畀大家知又做咗「亞洲最佳銀行」，仲係連續七年攞呢個獎。咁巴閉，唔大事宣揚又點對得住自己。
事實上，佢哋今次成績又真係幾好，事關除咗個大獎之外，仲攞埋新加坡最佳證券商，同埋台灣及印度最佳債券商獎項。花旗企業及投資銀行行政總裁RobertMorse猛話得獎好開心好榮幸，又非常識做咁話攞到七連冠全靠班客嘅支持。
連續七次頒獎畀花旗嘅，係著名財經月刊《Euromoney》班編輯。佢哋話，花旗中選，主要係間行嘅零售銀行業務做得好，又着重品牌，區內嘅網絡同產品夠全面，而亞太區（日本除外）有過半數嘅億萬富豪，都係佢哋私人銀行嘅客戶。