梁靖琪（Toby）日前為新歌《小樽》拍攝MV時，特地邀請了一名相識八年的混血兒好友擔任男主角，與她扮演一對情侶，但二人在拍攝深情對望鏡頭時，都忍不住哈哈大笑。
梁靖琪日前找來中學時期的好朋友，擔任其新歌《小樽》MV的男主角，她表示今次是應導演要求，才找好朋友拍攝MV。Toby說：「首歌係講兩個人雖然分咗手，但係都好回味之前嘅甜蜜生活，所以導演就想我搵個好了解、好熟我嘅朋友做男主角，佢怕是但搵個model拍嘅話，就拍唔出好sweet嗰種感覺。」
結果Toby出動友情牌找來相識八年的混血兒好友Rob參與演出，但她強調雖然與Rob相識多年，卻從來沒有愛上對方，她說：「我由識佢嗰日已經覺得呢個男仔好靚仔，特別係佢對眼又大，眼睫毛又好長，真係迷死人，但係我同佢就從來未有過火花，撻唔着，所以咁耐都係好好嘅朋友。」
「出街會拖手」
Toby又指與Rob要好的程度，不時令身邊人誤會，她說：「我同Rob出街時會拖手同搭晒膊頭，佢又會成日上嚟我屋企打邊爐，所以身邊唔少朋友都誤會我哋兩個拍拖，不過Rob有個好好嘅女朋友，如果大家喺街見到我拖住佢，就唔好誤會。」
採訪：李珮洳 攝影：陳慧安
