今日，孫柏文想同大家講兩樣嘢，第一樣係，我每次因冇女朋友而感到孤單嘅時候，用來安慰自己嘅「遲早都會有人接受我嘅追求論」；第二樣係，同祖國大陸單位營商嘅時候，面對嘅挑戰。
如果要講我嘅「遲早都會有人接受我嘅追求論」，首先就要探討，究竟一樣嘢，點樣先至係「好定係唔好」呢個問題。當然，「好定係唔好」係一個非常主觀嘅問題，可以話各花入各眼。同樣，一個人係唔係一個好嘅男朋友，亦都係個主觀嘅問題。好似孫柏文咁，唔識送花又成日唔記人哋嘅生日，女仔唔開心嘅時候，唔好話點解佢唔開心，連佢唔開心都唔知。牌面上，如果有女仔偉大到肯接受我嘅追求，我都要負責任咁畀佢知，我將會係個非常差勁嘅男朋友。
不過，就算我係個咁樣嘅男朋友，都可能有女仔覺得我係個「已經好好」嘅男朋友。例如，如果有一個女仔，佢以前嘅男朋友有打女人習慣，仲要精神虐待，相比之下，就算好似我咁嘅男人，可能都真係「已經好好」。
大家都知道喺大陸做生意或者同祖國大陸單位營商嘅時候，面對其中一個最大嘅問題，就係政府政策非常飄忽、難以捉摸。特別係稅務條例當中，可以話一時一樣，每級政府都可能會隨時介入，抽稅。一個生意人，就算面對龐大嘅市場商機，擁有最優良嘅管理系統，聘請咗最勤奮嘅員工同工人，都可能因為唔知道所有唔同級別嘅政府會點樣抽稅，而無法捉摸盈利前景、埋唔到數，所以放棄一門可以令世界消費者生活過得更好嘅生意。
各位作為《金手指》fan屎，可能會問：「今日無端端講呢兩樣，係唔係fa
無厘頭嘅稅單
其實，祖國政府政策相比起以前已經好咗好多，特別係嗰啲比較高姿態嘅生意項目，已經唔會亂嚟。最起碼，如果天安門廣場附近，再有麥當勞餐廳，相信今日應該唔會被迫遷、鏟平，然後再起其他嘢。再講，如果大家睇吓今時今日嘅俄羅斯，就算你係一間舉世聞名嘅企業，例如艾克森石油、英國石油公司等，或者係一個「人氣」非常高嘅生意人，例如尤科斯（Yukos）嘅前總裁Khodorkovsky，都可能分分鐘收到啲「無厘頭」嘅稅單，跟住就因為交唔到稅，被俄羅斯政府充公財產、公司被國有化。
早幾日，又有一間公司，收到俄羅斯政府發出嘅「無厘頭」稅單。呢間公司嘅主要業務，就係經營俄羅斯唯一一條唔係政府管理嘅輸油管。呢條輸油管嘅主要客戶，正係哈薩克斯坦，哈薩克斯坦係好依賴呢條輸油管出口石油。不過，俄羅斯此一舉動，亦迫哈薩克斯坦要同祖國合作。哈薩克斯坦每日出口大約100萬桶石油，而大陸每日消耗大約650萬桶石油，其中300萬桶係進口，當中超過九成要經過馬六甲海峽，即係話會被新加坡同埋佢嘅同盟花旗國威脅。
我絕對相信，就算俄羅斯政府冇發出啲「無厘頭」稅單，哈薩克斯坦到2010年，淨係畀祖國都可以每日提供超過100萬桶石油。不過睇埋今次，我諗到2010年，哈薩克斯坦可以提供畀祖國嘅石油，就絕對會比起我原先嘅估計，以倍數計多好多。今次可以話，俄羅斯政府就係有打女人習慣嘅男朋友，而祖國政府都算係「已經好好」啦！
孫柏文