首先解釋吓佢點解叫BeetleRagster先，Ragtop係解摺,叠式頂篷，而Speedster則係小型跑車，廠方將兩者合二為一，就成為呢部Ragster。BeetleRagster係Volkswagen廠方精心炮製嘅作品，車頂比普通版甲蟲矮咗150mm，又將A柱削短約9mm，做出一組U形車頂。而車頂有強化過嘅敞篷，遠睇就好似隻扁咗嘅流線甲蟲咁樣。
19吋巨型胎軨
Ragster車身就好似部美國跑車，頭尾燈組同包圍都有全新設計嘅，車廂都一樣，變化包括：整合式引擎啓動按鈕、頂篷開關、跑車軚盤、中央控制台雜物間等。而前後座變為2+2巨型桶椅，軚盤有特別控制器，可以開關車頂軟篷，不過引擎就無大變動，仍然係電油Turbo或香港人恨到發燒嘅油渣引擎。最驚人可算係19吋嘅胎軨，美式閃光（Bling）面兼大大個窿，霸王到不得了。咁美國樣，好明顯，BeetleRagster只會響美國出售，因為美國人對甲蟲嘅需求，竟然大大增加，更打破咗福士廠響美洲區賣細車嘅紀錄。
記者：伍旋卓