睇見咁多正斗到爆嘅畫面，同聽完小弟嘅介紹之後，到底閣下係咪有啲心郁想即刻買佢嚟玩呢？雖然隻Game仲有成個禮拜至出，不過大家都可以學我咁率先體會一下佢嘅超級無敵樂趣所在，就係親身前往由今日起至下星期二喺會展舉行嘅「2006第八屆香港動漫節」喇，因為《DEADRISING》會有試玩版嚟震撼各位來賓。仲有微軟特別邀請咗代言人Twins嚟大玩遊戲，兼且即場分享拍攝廣告時嘅感受同趣事㖭。與此同時，微軟會首度展示同Toys2R合作嘅《九十九夜》Qee公仔，確係潮人必備恩物，仲有靚價主機優惠套餐作即場販賣，睇啱試啱不妨拎埋部機返屋企繼續打。
至於本地機迷最引頸以待嘅XB360遊戲之一《BlueDragon》，官方都話會有最新鮮滾熱辣嘅Trailer畀大家先睹為快！此外當然仲有唔少快將推出同埋經已見街嘅焦點大作啦，加埋LiveArcade，真係忍唔住都要講句「唔玩唔舒服」！
