當年盧海鵬模仿羅文、拿着飯盒蹲在碼頭大唱《幾許瘋語》，這個MV被收錄在互聯網最流行分享短片的Youtube網站內，其他尚未收錄的還有《陪着你嘔》、《Stand噏》及與廖偉雄組成「撻成一塊」的《壽頭記》。扮嘢稱王，宜忠宜奸，移居外國的華人見到他總會熱情相待，蠱惑仔見到他就都退避三舍，難怪鵬哥自豪地謂：「係華人都識我！」 撰文﹕馬建華
鵬哥30歲前未接受過正統演藝教育，來港後本想報讀無綫藝訓班，可惜超齡。73年適逢第三期藝訓班放寬收生年齡限制，鵬哥順利過關，上學後才發現教授的竟是俄國戲劇大師史坦尼斯拉夫斯基著作《演員的自我修養》，他早於廣州時已自修熟讀此書，但又不敢自大認叻，每次考試只求及格便算。
亂爆肚震驚全廠
畢業後，鵬哥加入《歡樂今宵》，他說：「我第一晚開工就出事，嗰晚我有句對白，仲事先寫落份道具報紙度，點知佢哋飛沙走石亂咁爆肚，搞到過晒我都講唔到。監製想踢走我，好彩有人求情。」鵬哥笑言人人都爆肚，最重要有默契識執生。有次與吳孟達合演《太歲爺》，事前兩人以廣東話對稿，正式演出時鵬哥竟以山東話演繹，令達哥呆若木雞，震驚全廠。
後起之秀冇性格
談到早期的《歡樂今宵》不時加插現場廣告環節，鵬哥說：「有次臨時拉伕搵我做香煙廣告，連對白未睇清楚就講『食煙送金牛，晚晚送一隻。』之後廣告商走埋嚟同我講：『鵬哥，我哋邊有咁多金牛，係一個禮拜送一隻呀！』」
鵬哥擅長扮鬼扮馬，他笑說：「扮人唔需要太認真去留意，好似隨街見到個神經佬，無啦啦大叫，咁就係做戲嘅好材料。另外就係將人哋嘅缺點誇大去做，例如羅文唱歌會不停眨眼，徐小鳳就嘟嘴唱歌，葉振棠一緊張就歪嘴。」對於羅文、張國榮及梅艷芳等巨星先後離世，鵬哥倍感欷歔，他慨歎：「𠵱家啲人係紅，不過冇獨特性格，根本就冇得扮。」
後來鵬哥移居加拿大，數年後亞視邀請他返港參演綜合節目，鵬哥說：「佢哋要我同時間扮倪匡、陳慧嫻、王傑，得一個頭套，連牛仔褲、皮褸都冇，點扮王傑？叫工作人員將歌詞寫大字報又寫極都未得，等到火滾，掟低個頭套唔拍走人。」
一星期後，鵬哥再入廠開工，工作人員帶他入化妝間，打開衣櫃，裏面全是假髮，款式齊全，鵬哥坦言有暗裏開心過。
蠱惑仔退避三舍
鵬哥見證圈中風雲變幻，他說：「雖然唔係有乜嘢驕人成績，總叫做不枉此生。做呢行係有高低潮，好多人你睇住佢出世，𠵱家仲紅過你，我唔會眼紅。我都叫做去到邊都有人識，去到紐約周街有人同我打招呼、請我食飯，唔識路仲車我返酒店。喺加拿大開卡拉OK，班蠱惑仔喺我舖頭想打交，見到我都會自動走出街打，之後仲會走番轉頭畀錢，哈哈……叫做係華人都識我，都算係咁。」
