好多人羨慕班炒家賺錢，但炒樓嘅風險唔係人人承擔得起，淨係夠唔夠膽喺淡市買樓已經難倒好多人，因為隨時要有排守。
上半年二手市場稍為多啲成交量嘅，數埋都唔夠兩、三個月，即使買咗件平過市價嘅貨，想摸出都未必有人肯接手，中原黃良昇話，全港十大屋苑，截至今個月24號，總共只得32宗摸貨成交，其中觀塘麗港城、鰂魚涌康怡花園同埋柴灣杏花邨，更加出現零摸貨局面，投資氣氛跌入谷底，絕大部份投資者都要上會，即使遲啲可以賺價賣出，成本都大咗。
黃良昇仲話，麗港城更加係連續13個月冇摸貨，而幾個龍頭屋苑好似鰂魚涌太古城、紅磡黃埔花園同埋藍田滙景花園，今年都只係暫時出現過1宗摸貨成交。至於最好摸嘅就係荔枝角美孚新邨，暫時有14宗。