昨日大市在中移動（941）同滙控（005）帶動下，勁升299點，逼近萬七點水平，但小初一啲都唔覺得興奮，皆因主要係大市值一類嘅股份上升，而玩開嘅中小型股冇乜郁動，小初又點會開心？
經紀黃就教訓小初，話中小型股唔跌都已經偷笑，仲嫌冇得炒！回想去年所發生嘅泰興（389）事件，嚇咗班芬佬一大跳，連累好多工業股被質，其中一隻被沽得最淒涼係建滔化工（148）。今年輪到海域集團（1220）同海域化工（2882）孖寶出事，但絕大部份工業股都冇受壓，無論小投資者或工業股的老闆其實已飲得杯落。
講番建滔，隻股近期一直企喺高位，一來係公布即將分拆旗下積層板業務上市；二來係建滔話中期業績非常掂，預計溢利增長45％至55％。雙喜臨門，股價企硬好合理。建滔昨微升0.21％，收23.60元。
慕容小初