侍仔：估唔到費Sir一個咁自負嘅人，都會向佢嘅所謂敵人賣口乖。前日佢喺英傳媒面前大讚雲佬，話佢喺訓練場上嘅態度積極。
菠蘿文：佢都係做戲咁做啫，雲佬自從上季季中開始已經做後備，再加上世界盃佢表現又一般，我係佢都會顧吓自己嘅足球前途啦。
招積域：其實佢係一個好球員，記得有一季曼聯成隊波士氣極低，但惟有雲佬一個有貨交。如果唔係佢，曼聯嗰季連歐協盃都冇得踢。
入錯貨兼乏長線投資
侍仔：去拜仁又好，去皇馬都好，只希望雲佬快快離開費Sir呢個心理變態嘅領隊。
菠蘿文：呢個老人家當咗自己係皇帝，一對佢有意見就會掛牌出售。但好奇怪喎，賣人即使有幾大影響都好，但都可以踢到歐冠。唔知係英超質素低，定係費Sir眼光太準？
招積域：比甲布魯日、安德列治咪又係歐冠常客，但經常喺分組賽出局。曼聯假以時日都會咁樣情況，費格遜要冷靜些少。
侍仔：其他大球會買嘅係世界級球員，但曼聯呢？隊入面除咗朗尼之外，有邊個真係世界級數呢？成隊曼聯𠵱家其實正在貶值，同費Sir入貨眼光大有關係。
菠蘿文：唔單只咁，佢賺嘅錢都唔夠皇馬多啦。
招積域：算啦，費Sir已經冇咗以往嘅眼光，一係買即食，一係入錯貨，完全冇長線投資。
高洛文