Katie是尖沙嘴地膽，家住尖沙嘴，Shopping逛加連威老道，夜晚蒲吧去漆咸圍，尋吃？她推介山林道。沒錯山林道食肆林立，但十間有八間都是日本料理店，以為她只懂吃甚麼壽司刺身，誰知她說︰「你咁諗證明你膚淺，日本料理店開得太濫喇，其實山林道仲有大把好嘢食，跟我嚟，保證你唔使DayDay硬食日本嘢。」好，今日就信一信你這支盲公竹，出發。
記者︰方綺君
攝影︰陳偉強
模特兒︰Katie（Salvador）
越南菜：
喫大大隻大頭蝦！
Katie說︰「唔，今Day先喫『老趙』。記得細細個媽咪已經帶我嚟呢度食嘢㗎嘞，第一代越南餐廳，有28年歷史。」新舖菜單和對面舊舖一樣，不過大頭蝦菜式就新舖較多。老闆老趙說︰「因為有相熟來貨，『老趙』賣得嘅，一定係香港至大至正嘅大頭蝦。」這麼囂張？Katie咬着蝦頭說：「又抵佢囂，寸得起噃。蝦身同蝦頭長度比例接近1比1，最大嗰隻超過10吋長。」吃完大頭蝦，老趙推介我們飲杯特製檸檬梳打︰「入面嘅糖水用冰糖加香料煮香，入口有陣特別餘韻，食完油膩嘢都唔會覺得滯！」餘韻？甚麼叫餘韻？不明，不過我覺得有點香茅味，透心涼。
酸子扒大頭蝦普通$98，珍寶$118
酸子學名羅望果，老趙說︰「齋食會太酸，要落糖中和。」煮好的酸子汁淋在走油後的大頭蝦上，口感香脆，味道酸甜開胃。
大頭蝦帝皇炒飯$98
大頭蝦起肉炒成蝦球，蝦膏用來炒飯，粒粒米飯充滿蝦膏香；由於蝦隻新鮮，顆顆蝦球好彈牙，份量多夠兩三人一齊吃。
獨門亁撈金邊粉$36
配料有扎肉、豬肉片、雞紅、蝦等等，底層有少許麻油，記得落炸蒜及魚露撈勻金邊粉一齊吃，味道不會太搶，我吃光一碗。
a.老趙越南餐廳（23147966）
地址︰尖沙嘴山林道12號地下
營業時間︰12:00nn-11:00pm
座位︰80個
潮州菜：
拮住食罕見鮮蚶！
我留肚不敢吃太飽，跟Katie繼續行到街尾，忍不住問：「行到山林道盡頭咯喎，究竟去邊呀？吓？普通茶樓我唔影喎。」Katie又是這一句︰「咪咁膚淺，呢間舖叫『潮州名廚』，入面有幾道出面潮州舖都無得食嘅菜式㗎。」未入店，見到大招牌、養着各類海鮮的魚缸，大路海鮮酒家格局，夠膽叫「潮州名廚」？坐定定，點潮州秘製鹹鮮蚶和金不換炒薄殼，經理話︰「呢兩個菜我哋間舖獨有。」用牙籤拮起蚶肉放入口，鮮味到似在吃生蠔。
秘製鹹鮮蚶例牌$60
用蒜、薑、指天椒、生抽、酒、魚露等材料浸製鮮蚶8小時，浸太久味道會太鹹。師傅用牙刷逐隻刷洗鮮蚶，入口不會成口沙，味道不辣似吃生蠔。
金不換炒薄殼例牌$48
師傅仔說︰「7月食薄殼好，因為當造。」果然，薄殼入口非常鮮甜，加金不換落鑊炒更惹味，不過太細隻，吃極不夠喉。
b.潮州名廚（27226600）
地址︰尖沙嘴山林道50號俊僑商業大廈地下及1樓
營業時間︰11:00am-12:00mn
座位︰100個
泰國菜：
豬腳踭送飯一流！
泰國菜館「太」最出名黃油雞飯，Katie卻向我推介泰式豬髀飯：「你開始飽？唔係嘛，不過唔使驚，所謂嘅豬髀只不過係豬踭，燜足一粒鐘超入味，飽都要食呀。」
冰鎮孖寶$48
蘸芥末吃冰鎮鮑片和芥蘭，毋須特別調味。可能天氣熱，孖寶入口清涼，忍不住吃完一片又一片。送飯一流。
泰式豬髀飯$38
豬髀即豬腳踭，用南薑、香茅等材料燜足1小時，燜到肉質變腍變軟，一咬鬆化不用再落其他調味料。
c.太（25521111）
地址︰尖沙嘴山林道46-48號運通商業大廈地下20-27號舖
營業時間︰星期一至六12:00nn-12:00mn，星期日休息
座位︰25個
有着數︰消費滿$100或以上9折、外賣自取9折
新加坡菜：
下午茶整件多士！
Katie拖我入「有星味」吃新加坡菜：「新加坡菜又叫娘惹菜，集合馬來西亞、印度、印尼和中國口味，本身就係Fusion菜。我下午茶必定嚟呢度喫番件咖吔多士㗎。」
咖吔多士$12
中間夾了班蘭汁和椰奶，比一般油醬多了份香草味，我想這就是班蘭的味道了。
爐燒牛魔王椰香叻沙$30
食新加坡菜怎可不提叻沙，食完蛋糕Katie竟然可以叫多碗叻沙，「叻沙椰子味好香濃，但係又唔會過火，每次嚟必食，唔係點對得住自己。」唔使講到咁嚴重，知你為食先叫啦！
d.有星味（23759229）
地址︰尖沙嘴山林道29-31號廣利樓地舖4A
營業時間︰12:00nn-10:00pm
座位︰20個
