置地係中區大業主，喺甲級商廈租金屢創新高嘅環境，根本唔憂租，大把條件揀客，最近攞咗怡和大廈一個千零呎單位出嚟放租，結果由一間內地律師行打贏幾個準租客，成功進駐中環核心商業區，都算罕見。
中原香港商業部營業經理梁嘉榮報料，置地定出租金叫價，然後收取準租客資料再作篩選，總共有幾間大型公司洽租，結果呢間上海律師行同香港合夥人，畀置地睇中，原因係呢間律師行喺內地來頭好猛，夠晒實力。
間律師行遲啲可以進駐怡和大廈34樓16至18室，面積約1357方呎，月租約9.2萬，呎租近68蚊，屬市值租金。
講開內地律師行嚟香港核心商業區開檔做生意，梁嘉榮話金鐘遠東金融中心都有一單，係42樓03室，面積1393呎，月租5.2萬，呎租37蚊；單位仲有維港景㖭，果然夠氣派。
內地CEPA第三階段畀香港律師北上搵食，做轉介服務，但內地律師行就南下香港開業，成為核心商業區新客源，睇嚟中區甲級商廈租金想跌都幾難。
電郵地址：[email protected]