話想退休已經兩三年嘅中信集團董事長王軍，自從成功由建設銀行拉番圍棋高手常振明回巢，安排好接班人後，終於可以如願以償。中信集團噚日正式宣布，服務咗27年嘅王軍將會退休，由孔丹出任集團第4代掌門人，常振明就坐孔丹個副董事長兼總經理個位。
王軍係高球發燒友，佢話希望退休後做高球草坪師，事關除咗打波，佢仲鍾意研究啲草，日後如果喺中信旗下啲高球場見到個牛高馬大、老老哋嘅友仔，喺球場度走嚟走去唔知睇乜，千祈咪當佢係球僮。
建設銀行噚晚亦公布，董事會已委任原交通銀行行長張建國為建行行長，並建議委任張氏為該行副董事長兼執行董事，有關安排仲要等中國銀監會批准及該行股東大會通過。