大教授請食飯，無所不談，由中國經濟講到名家字畫以至本地大學到內地招生、「搶狀元」，大教授娓娓道來，大家聽得津津有味。
大教授二十六年前就應邀回國講學，佢記得當日上課嘅學生之中，有兩位好肯發問，學習精神極佳，大教授認為佢哋好有學術前途，不過呢兩位精英後來都做咗官，而且官運亨通，今天無人不識，對中國金融極有影響力。
因咁早去到北京、上海，大教授買咗唔少字畫，後來知道「入貨」有真有假，有賺有蝕。大教授話：「即使到咗今日，一啲公開拍賣嘅字畫，仍難分真偽。因中國在戰前（現在情況唔多清楚）有古紙、古墨出售，而中國人學畫，好多時由臨摹開始，學得叻之人，可以寫字寫到有八九分近乎真跡。外國畫家就唔會一開始學畫就臨摹先賢嘅，外國人講求個人創意，我哋啲騷人墨客就以學習前人書畫為基礎之學，所以中國字畫之仿偽作特多。前輩教我一個粗略嘅鑒別方法，就係將幅字放在燈光底下，仔細睇真啲字有冇勾勒痕跡。譬如寫個『左』字，真跡梗係一筆一畫，一氣呵成，但假嘢呢，會先『勾』個字出嚟，然後用墨填滿空間，細心啲在燈光照射下會發現到。」
大教授去三藩市與校友聚會，有校友捐出一幅字，拍賣籌款，此幅字由大教授先人所寫，大教授於是以一千美元投得，當捐錢畀校友會。返到嚟，睇多幾次，先發覺係他人「填字」之作，並非真跡，校友們一時不察上咗人當，大教授一笑置之。佢話以前有一位富豪觀賞名畫展覽，請埋一位大畫家作陪，見到一幅自己鍾意嘅，賣幾十萬，於是問大畫家：「呢幅畫真定假？」大畫家話：「假嘢。」買家於是唔買，後來有人告知，大畫家買咗嗰幅畫，富豪心裏好唔高興，再請大畫家去睇另外一個畫展，指住一幅過百萬元嘅畫問是真是假，大畫家話：「絕對係假嘢。」富豪立即買下。後來搵一位專家鑑證，專家靜靜雞同富豪講：「真係假貨嚟㗎！」大教授問我哋：「你估大畫家邊句真邊句假？」此乃IQ題。