之前試過積架XK跑車，感覺唔錯，見今期《AutoExpress》用架黃色勁Sharp嘅積架XKR做封面，特別有親切感，即刻攞嚟參詳吓，一路睇，只見筆者讚多過彈，由外形到Performance，幾方面都比XK更優勝。XKR車身比XK再輕70kg，加上一台有420匹馬力的4.2V8引擎，0-60km/h只需4.9秒，減磅後，新車截然不同，入彎快而準，筆者至覺得XKR的操控甚至比同級車如AstonMartinVantage優勝。
日產MicraC+C小開篷
今期有日產MicraC+C1.6電動硬頂開篷，有1.4同1.6兩副引擎可供選擇，筆者一連試晒自動波同棍波，起步前者反應較後者慢2秒，學佢話齋，唔係用嚟飛，又想慳番900英鎊，可以考慮1.4自動波。除此，車廂空間同樣麻麻，後面兩個位勁細，唔開篷的話，高佬免問，4個位等於2個位，好睇唔好坐。最後不妨睇埋本田架全新CR-V，車頭、車尾大變身，個款變到成架歐洲SUV咁，靚唔靚？見仁見智！
記者：黃婉冰 攝影：陳偉強
