財富管理呢個肥到漏嘅市場，銀行、保險、基金公司個個都吼實，唔同嘅金融行業，有唔同嘅監管機構及準則，所以成日有「唔公平」嘅情況出現，咁為咗爭取自己界別嘅權益，啲相關嘅同業會組織協會，無他嘅，都係想多把聲，雖則好多時真係得個講字，但有say總好過冇啦！
噚日又有個獨立理財顧問協會（IFAA）成立，專幫獨立理財顧問（IFA）謀幸福，新會開檔，梗要有啲建樹，所以佢哋做咗個有關業界嘅調查，話有87%嘅受訪業界，要求銀行、經紀行及IFA，要有同一套監管法例．．．
講係咁講，經紀嗰邊嘈咗好耐，家吓咪仲係一業兩管，華華都想睇吓，今次IFAA夠唔夠牙力，可以迫到有關當局做番啲嘢。